Pragbúar

Bæ bæ blogg

2007-05-21T21:50:00.001+02:00

Jæja, þá er stóra stundin komin. Við erum búin að pakka saman dótinu okkar og tilbúin að setja það inn í gáminn sem kemur á miðvikudag. Flugið heim er svo á fimmtudagskvöldið og við erum að farast úr spenningi.

Verðum þó að viðurkenna að þegar stundin er farin að nálgast að það mun verða margt í Prag sem við eigum eftir að sakna. Röltum úti í garði eftir kvöldmat í 25°C hita og horfðum á sólina setjast - en þó meira á hundana út um allt.

Eins og margir vita erum við búin að kaupa okkur íbúð á Íslandi og flytjum að sjálfsögðu í Hafnarfjörðinn. Við þurfum að mála og svo seinna meir taka úr gámnum og því allir velkomnir að koma í heimsókn (svo lengi sem þið lyftið pensli eða kassa :-)

Takk fyrir að fylgjast með okkur - erum samt guðs lifandi fegin að vera hætt þessu bloggveseni, ekki beint verið þau duglegustu. En Alli vill gjarnan röfla svo hann væri nú alveg vís til þess að byrja með nýtt blogg.. við látum þá vita hér.

Na shledanou (örugglega í síðasta skipti),
Sylvía & Alli

Tveggja ára..

2007-04-06T18:20:00.000+02:00

Í dag erum við skötuhjú búin að búa í Tékklandi í tvö ár. Ótrúlegt hvað tíminn líður hratt. Eins og flestir vita þá verða árin ekki fleiri og við flytjum á klakann í vor. Farið að hlakka rosalega til!

Farin að njóta veðursins í Prag á meðan við enn getum,
Sylvía & Alli

Kraká

2007-03-29T16:38:00.000+02:00

Síðustu helgi smelltum við okkur í heimsókn til Kraká í Póllandi. Aðaltilgangur ferðarinnar var nú að skoða Auschwitz en skipulögðum þetta þó þannig að við hefðum smá tíma í borginni.

Eftir smá vesen við að finna hótelið kom í ljós að staðsetningin á því var alveg frábær og út um svefnherbergisgluggann horfðum við beint yfir á Wawer'inn - eða aðalkastalann.

Hérna eru myndir teknar frá hótelinu..

Nokkrar aðrar myndir frá Kraká..

Gaman að segja frá því að við kveiktum aðeins á sjónvarpinu um kvöldið og komust að þeirri niðurstöðu að talsetning í Póllandi væri sú allra slakasta. Það virðist bara vera einn maður á öllum stöðvunum sem talar fyrir alla, jafnt konur sem karla! Hann talar meira að segja fyrir teiknimyndirnar. Síðan heyrir maður enskuna lágt undir án þess að geta fylgt henni eftir, vonlaust!

Morguninn nýttum við svo í rölt um miðbæinn og verðum við að segja að Pólland í heildina kom okkur mjög skemmtilega á óvart. Allir rosalega þjónustulundaðir, enskan góð og snyrtilegt yfirbragð yfir öllu. Maður er kannski með einhverja staðalímynd í kollinum en ekki spurning að við hvetjum fólk til að heimsækja landið.

Alli & Sylvía

Rocky

2007-03-08T18:29:00.000+01:00

Það hefur nú eitthvað drifið á daga okkur síðan við skrifuðum síðast. Helgina 16.-19. febrúar kom Steini vinur Alla alla leið frá Boston, USandA. Á meðan hann var hérna var að sjálfsögðu skoðað Prag og svo lögðum við leið okkur til Þýskalands og Dresden heimsótt enn einu sinni. Við gripum tækifærið og pöntuðum hringana okkar, sem við erum svo að fara að sækja á morgun.

Steini í göngunum á leið upp á topp Frúarkirkjunnar..

Við á göngu meðfram ánni..

Lögðum okkur fyrir framan einhverja styttu, þurftum svo að forða okkur þar sem stalkerinn var svo ofvirkur með myndavélina..

Ekki slæmt að búa þarna..

Og Alli hélt áfram að herma eftir styttum..

Steina leist bara nokkuð vel á Prag, að við höldum, en hann var hins vegar ekki með myndavél svo hann sýnir engum hvað var flott. Við erum nokkuð örugg á því að það er hægt að kæra fólk fyrir myndavélaleysi í Prag. Að sjálfsögðu var skellt sér út á lífið en að íslenskum stíl og því farið að róast í Tékklandi þegar við fórum loks út.

Helgina eftir heimsókn Steina fórum við skötuhjú í heimsókn á klakann. Það var mjög stutt stopp í þetta skiptið svo ekki gafst tækifæri á að hitta fleiri. Við vorum hins vegar rosa dugleg og komum miklu í verk - við ræðum það betur síðar ;-)

Sjáumst síðar krókódíll,

Sylvía, Alli & Adrian

Ekki alveg málið..

2007-02-07T21:48:00.000+01:00

Ég mætti í lögfræðitímann minn (property law) á þriðjudaginn og fékk þá í hendurnar þessa kennsluáætlun..

Langa sögu stutta - ég fór í dag og fann mér annan áfanga og hætti við þennan. Alli var víst ekki alveg nógu sáttur með þennan. Hvað ætli það þýði ef þessi kennari er með "oral exam"?

Yfir og út,
Sylvía

Dettur enginn titill í hug

2007-01-30T20:10:00.000+01:00

Það hefur eitthvað aðeins verið að gera hjá okkur undanfarnar vikur. Þarsíðustu helgi smelltum við okkur í göngu í Þýskalandi, maður er nú aldrei svikinn af náttúrunni þar. Að vísu fórum við tveimur dögum eftir óveður og þar af leiðandi mikið af brotnum trjám sjáanleg á leiðinni. Tókum nokkrar myndir.

Erum að gera okkur klár..

Víða mátti sjá afleiðingar óveðursins..

Alli fann "náttúrulegan" göngustaf sem vakti furðulega mikinn áhuga hans..

Guðjón tapaði sér..

Alli að horfa yfir lýðinn.. eða skóginn..

Svakaleg hengiflug og Alla ekki sama þegar Sylvía fór að hoppa yfir á glórulausum stöðum!!

Við vorum nú ekki viss hvort þið vilduð virkilega sjá þessa, en það er rétt að taka fram að fallið er alveg jafn mikið og það lítur út fyrir að vera - og göngustígúrinn alveg jafn mjór..

En við komumst alla leið :)

Svo núna síðustu helgi var að sjálfsögðu legið yfir handboltanum og svo horft á pre-eurovision keppnina. Vorum með Íslendinga í heimsókn (ásamt tékkneskri kærustu) og horfðum, tja ekki svo stolt, á söngfuglana. Bróðir eins sem var hérna í heimsókn var sem sagt að keppa.

Vorum alveg á því að Jónsi og hans atriði hlyti að vera það hallærislegasta sem við höfum séð, í fyrsta lagi var útlitið á honum algert slys og hvað var þetta með honum.. vændis-nunnur?

Fyrr um daginn höfðum við samt farið í göngu hérna innan Prag - skoðað semsagt annan kastala hérna í Prag sem heitir Vysehrad. Gaman að sjá Prag þakkta í snjó, að vísu er hann farinn núna og farið að hlýna. Höfum aldrei séð snjó sem endist í meira en viku hérna.

Setjum myndir inn síðar - erum farin að borða,

Sylvía & Alli

Snillingur!

2007-01-19T10:25:00.000+01:00

Verð bara að monta mig og láta ykkur vita að konuefnið mitt er snillingur. Hún var að fá úr prófunum og hún er með eitt -A og fjögur A. Á íslenskunni þýðir þetta meðaleinkunn á bilinu 9,5 til 10!!

Það verður flott þegar hún er búin með námið. Ég sé fram á að geta sest í helgan stein og spilað golf allan daginn meðan hún sér fyrir okkur. Ljúft!

- Alli

Betra í ár..

2007-01-18T14:08:00.000+01:00

Jæja, ég vældi yfir því fyrir tæpu ári hvað það væri hrikalega kalt hérna á veturna enda voru -18°C morguninn sem ég skrifaði á bloggið.

Sé mig því tilneyddan nú til að segja ykkur að þetta er nú eitthvað upp og niður hvernig veðurfarið er hérna í Prag á þessum árstíma. Núna er til dæmis 13°C hiti sem verður að teljast allþokkalegt - Guðjón til að mynda fór á stuttbuxum í vinnuna í morgun og fæst ómögulega til að klæða sig betur.

Yfir & út,

Alli

P.S. Fólk sem býr sunnar en Tékkland er vinsamlegast beðið að commenta ekki :-)

Franskt barn - nei takk

2007-01-15T18:14:00.000+01:00

Við höfum komist að þeirri niðurstöðu að frönsk börn eru ekki svo skemmtileg börn. Í raun getum við vel skilið ef foreldrar þeirra kjósa að fara frí án þeirra. Fyrst kynntumst við þessu á Krít, þar var frönsk fjölskylda rétt hjá okkur. Þarna voru foreldrarnir og svo systur á milli fjögurra og sjö ára gamlar. Almáttugur hvað sú eldri gat vælt út í eitt! Það virtist ekki breyta máli hvað gerðist í kringum barnið - hún grenjaði yfir því.

Núna um helgina fórum við svo á kaffihús niðrí miðbæ. Fyrir furðulega tilviljun settust franskar fjölskyldur á borðin sitt hvoru megin við okkur (reyndar var kaffihúsið franskt). Önnur fjölskyldan leit nú hreinlega öll út fyrir að vera í fýlu, en þó var sonurinn sá eini sem vældi eins og stunginn grís yfir því. Þeim hlýtur að hafa þótt Prag einstaklega leiðinleg - tja eða þau voru bara öll þreytt á syninum.

Hinum megin var mun lífsglaðari fjölskylda, ekki misskilja okkur þau voru samt ekkert brosandi. En þar voru þrír bræður og sá yngsti nánast tapaði sér þegar þjónustustúlkan var að taka pöntunina hjá fjölskyldunni. Honum var greinilega mikið í mun að fá réttu kökuna!

Svo virðist sem að alltaf sé eitt systkini sem sér um vælið fyrir allan hópinn - hver er það í þínum systkinahóp?

Au revior.. nei annars bara bless,
Sylvía & Alli

Gleðileg jól!

2006-12-26T12:15:00.000+01:00

Sökum óviðráðanlegra ástæðna (tja, höfum semsagt enga góða afsökun) þá verður þetta "jólakort" að duga þetta árið en á næsta ári þá munum við senda slík út - og það er loforð.

Gleðileg jól og farsælt komandi ár - hafið það alveg ofboðslega gott um hátíðarnar!

Ykkar,
Alli & Sylvía

Köben

2006-12-15T09:29:00.000+01:00

Jæja, þá sitjum við á flugvellinum í Köben og bíðum eftir Guðjóni. Merkilegt hvernig fólki tekst að vera seint meira að segja á milli landa!

Nei, það er víst ekki alveg svo einfalt. Af tæknilegum ástæðum er Guðjón að koma með öðru flugi en við frá Prag en verður síðan samferða okkur til Íslands.

Vart hægt að lýsa spennunni en okkur er farið að hlakka alveg ofboðslega til að komast heim á klakann. Við treystum á að það sé norðan gaddur og stórhríð, það væri alveg æðislegt. Ekki verra ef það er þokkalega hvasst! Jú, síðan erum við alveg komin í þörf fyrir að sjá jólaljósin en Tékkarnir eru ekkert í þeim bransa - allavega ekki í heimahúsum.

Röltum þó í gær niður í gamla bæinn og þar er gamla torgið alveg rosalega flott og höfum við aldrei séð jafn flott jólatré. Því miður vorum við ekki með myndavél með okkur en hérna er mynd frá því í fyrra (jólatréð núna er samt MIKLU flottara).

Við lendum síðan á Íslandi klukkan 15:30 og viljum biðja þá sem hafa ekki þegar bókað tíma að gera slíkt hið fyrsta - fyrstir koma fyrstir fá! Nei að öllu gamni slepptu þá lítur út fyrir að þessir "frídagar" verði vel nýttir. En allt er þetta frábært fólk sem við erum að fara að hitta og viljum endilega hitta sem flesta.

Jólakveðja frá Kastrup,
Alli & Sylvía

P.S. Ef einhver er með góða leið til að drepa 3 klst á Kastrup þá endilega látið ljós ykkar skína!

Jólamarkaður

2006-12-06T09:39:00.000+01:00

Við smelltum okkur til Dresden núna síðustu helgi til að heimsækja jólamarkað þeirra Dresdenbúa. Al-þýskt jólaskraut í boði sem að við stóðumst ekki og komum þar af leiðandi heim með góðan jólagrip.

Að sjálfsögðu náði jólaandinn tökum á okkur enda ekki annað hægt á svona markaði. Hundfúlt að geta ekki farið að velja jólatré - enda væru það frekar gagnslaus kaup hér í Prag þar sem við komum á klakann þann 15. des. Alli vildi endilega kaupa þennan en Sylvía var ekki alveg jafn sannfærð og sættumst við á að kaupa eitthvað "aðeins" fíngerðara.

Þar sem hungrið náði tökum á okkur á jólamarkaðinum var farið og keypt sér al-þýska vöfflu með súkkulaði og rjóma. Það reyndist áskorun að borða þetta með höndunum. Þjóðverjar hljóta að vera sérgerðir til þess að borða hluti án borðs þar sem þeir virtust allir vera að borða hinar ýmsu kræsingar í höndunum. Á meðan vorum við íslensku aularnir að strögglast við vöffluna. Það virðast nú leynast einhver þýsk gen í Sylvíu og hún kom bara ágætlega undan þessu en Alli er hins vegar al-íslenskur og var.. tja, þurfti allavega á smúlun að halda (þó að myndin sýni ekki rétta mynd af aðstæðum).

Gaui alltaf með myndavélina á lofti og hægt að sjá myndirnar á síðunni hans.

Auf wiedersehen,
Sylvía & subburnar

Buongiorno

2006-11-19T11:16:00.000+01:00

Það var æðislegt í Róm! En við Alli tókum engar myndir - enda á Gaui mun betri myndavél og hann sá því um þetta. Hægt að sjá myndirnar á http://myndir.ekkert.is/kromby

Vorum á hóteli í 7 mínútna og 47 sekúndna fjarlægð frá hringaleikahúsinu þeirra. Þar fórum við inn ásamt leiðsögumanni. Fengum að heyra frá hinum ýmsu atburðum sem áttu sér stað þarna, yammí. Ein af skemmtilegri tilraunum Rómverja var að nudda lykt kvenkyns ljóns á mann og kynna hann svo fyrir sveltu (á alla vegu) karlkyns ljóni. Niðurstaða: karlkyns ljónið varð ekki ástfangið.

Svo var gengið og gengið og gengið. Skoðuðum ótrúlega margt á einni helgi. Fórum svo á laugardeginum í Vatikanið, ætluðum upphaflega að skoða Sixtínsku kapelluna en það gekk nú ekki nógu vel þar sem þegar við mættum, rétt fyrir níu, var röðin orðin svo hrikalega löng, það tók okkur hátt í 20 mínútur að ganga eftir henni til að finna endann. Ákváðum skyndilega að koma bara aftur seinna og skoða kapelluna og mæta þá í röðina um sex að morgni!

Vatikanið er alger klikkun, ekkert smá flott og ljóst að kapparnir geta lifað á að sýna þetta næstu tvö þúsund árin eða svo.

Reyndum svo að fara aðeins út á lífið á laugardagskvöldinu. Byrjuðum að borða á veitingastað þar sem Alli og Gaui fengu báðir vondan mat, Sylvíu matur var fínn. Gallinn við staðinn var nú ekki bara maturinn heldur var skítakuldi þarna inni. Eftir mat var skellt sér á bar, þar var aðeins hlýrra, en ekki nógu hlýtt til þess að fara úr yfirhöfnunum. Hvers konar stemning er það eiginlega? Mikið var gott að koma inn á hótelið og þiðna.

Þá er innan við mánuður í að við mætum á klakann. Komum til Íslands 15. desember og tilhlökkunin ekki lítil.

Later,
Sylvía & Alli

Róm - Róm - Róm

2006-11-09T22:51:00.000+01:00

Við erum á leiðinni til Rómar í fyrramálið. SCORE! Vonandi tekst Sylvíu ekki að setja Alla á hausinn, en hún mun reyna :)

Verðum þarna annað kvöld..

Lítið annað að frétta af okkur í bili - en fengum æðislegar fréttir í gær. Enn og aftur til hamingju, þið vitið hver þið eruð.

Arrivederci,
Sylvía & Alli (& Gaui)

Berlín

2006-10-15T11:26:00.000+02:00

[Eftirfarandi færsla er frá 15. október, ekki sett inn fyrr vegna tæknilegra örðugleika]

Það var sem sagt ákveðið að skella sér strax fyrstu helgina sem Gaui bróðir var hérna til Berlínar. Svo það var byrjað að leita að hóteli á fimmtudeginum.. fórum á laugardagsmorgni. Það var nú eitthvað lítið í boði - nema við værum til að borga 50.000kr. eða meira fyrir eina nótt. Loksins fannst hótel, því miður ekki í miðbænum en það var svo sem ekki mikið mál að nota tram og metro (svo lengi sem Alli og Gaui fengu engu að ráða.. þeir vildu alltaf fara í vitlausa átt).

Þegar við komum svo á hótelið förum við Alli inn á herbergið okkar - sem var ekki svo smátt. Það voru tvö herbergi inn í því og í heildina sex rúm! Gaui bróðir var svo með þrjú rúm í sínu herbergi - svo við vorum með þrjú rúm á mann, alveg nauðsynlegt að sjálfsögðu.

Við eyddum nú ekki miklum tíma á þessu hóteli - fórum beint niður í bæ og skoðuðum svona það helsta. Hérna eru svo myndirnar..

Hérna er bygging sem múnar á mann..

Hérna erum piltarnir á Alexanderplatz..

Þetta er líka á svæðinu við Alexanderplatz..

Síðan fundum við þetta skemmtilega hlið (gaman að taka fram að rétt hjá þessu hliði er hótelið sem Wacko Jacko sveiflaði barninu sínu yfir svalarhandriðið)..

Fundum svo þennan garð sem okkur fannst skemmtilegur..

Rétt hjá garðinum fann Alli svo bíl sem honum langar í, það fór nú smá stund í að skoða kvikindið..

Og önnur mynd af bílnum..

Svo fundum við þennan stóra fína garð rétt hjá Brandeburghliðinu..

Guðjón var gríðarlega ánægður með garðinn..

Pose..

Svo seinni daginn var farið og smellt sér að sjá nýrri hluti á Potzdamerplatz - þar er allt fullt af nýjum húsum. Enda var ekki hægt að byggja á því svæði þar sem Berlínarmúrinn fór þar þvert yfir.. bögg!

Berlín reyndist bara ágætasta borg og ekki ólíklegt að maður skelli sér bara aftur þegar þeir drengir eru ekki að vinna. Annars er næsta ferð nú þegar skipulögð og við sem sagt á leiðinni til Rómar helgina 10-12 nóvember. Oh my oh my - það verður sko verslað!

Kveðja,
Sylvía & Alli (& Guðjón)

Haustfrí

2006-10-07T14:28:00.000+02:00

Löt - já svo sannarlega, en núna er stefnan á að bæta úr því með þessari færslu. Held að fólk vanmeti algerlega tímann og dútlið sem fer í að setja inn svona nokkrar myndir í einu. En þar sem í dag og er laugardagur og Alli er í vinnunni hefur Sylvía svo sem ekkert betra að gera nema læra.. ekki erfitt val.

Við fórum sem sagt til Porec í Króatíu föstudaginn 15. sept og vorum þar yfir helgina, fórum svo aftur heim á mánudeginum. Tilefni ferðar var núna afmæli Húsavíkurmömmu en hún varð fimmtug núna í sumar. Þar sem við fórum ekki á klakann í sumar þá var nýtt tækifærið og skellt sér til þeirra, en þau voru í fríi í Porec. Ekki virðist Króatía vera hrifin af okkur og það rigndi eða var skýjað allan tímann. En það hafði svo sem lítil áhrif á okkur, enda Íslendingar og því öllu vön.. fyrir utan sól og hita.

Við flugum sem sagt til Trieste og keyrðum þaðan til Porec - ferð sem tekur eðlilega svona klukkutíma en þökk sé skemmtilegs aukakróks sem við Alli ákváðum óviljandi að fara tók það svona fjóra. En miðbær Trieste, sem við áttum ekki að sjá, er gríðarlega fallegur!

Sylvía tapaði sér aðeins á myndavélinni og var nú að gera fólk frekar þreytt á eilífum myndatökum. Hún hefur nú unnið í sínum málum og hefur minnkað myndatökur niður í þrjár myndir á mínútu í ferðalögum.

En hérna koma nokkrar myndir frá ferðinni. Fyrsta deginum var að sjálfsögðu eytt í Porec og þar gengið um. Hérna eru nokkrar myndir frá strandlengjunni..

Á labbinu í bænum fann Alli þessa æðislegu búð, það tók okkur hin þrjú dágóða stund að toga hann burtu..

Alli og Þorgrímur (Húsavíkurpabbi) ræddu um bátana..

En við dömurnar voru miklu sniðugri og vorum ekki lengi að finna okkur betri áhugamál..

Alli fann svo eitthvað annað en báta sem vakti áhuga hans..

Svo var sest niður og hugsað málin :)

Á sunnudeginum var svo leiðinlegra veður svo við gripum til þess ráðs að forða okkur í annan bæ, fyrir valinu varð bær sem heitir Pula. Þar sem Húsavíkurmamma var með í ferð vorum við uppfrædd um ýmislegt merkilegt við þennan bæ og þá einn helst um þessa græju..

En Feneyingar komu í þetta hús sem er sjötta stærsta hringaleikahúsið í heiminum í dag og týndu úr því grjótið. Þannig að núna eru engar upprunalegar áhorfendastúkur. Meiri ruddaskapurinn! Ef þið viljið fleiri upplýsingar þá held ég að Húsavíkurmamma viti allt um þetta.

Alli fann sér að sjálfsögðu stað til að horfa yfir lýðinn, og eftir að hafa séð myndina vill hann láta kalla sig sir eða master Alli..

Við tókum þá ákvörðun að fá einvherja svona hlustunargræju (ofvaxinn gsm) og eltum því númeraða staði innan hringaleikahússins og fengum að vita hitt og þetta. Stóðum því alltaf svona gáfuleg í einni stöppu upp við númer..

Að lokum var svo skoðað meira í bænum og þar fannst þessi skemmtilega sigurbogi (og sönnun þess að Sylvía var með í ferð)..

En ekki er hægt að klára að segja frá Króatíu ferðinni án þess að minnast á bílinn sem við vorum á. Það var sem sagt Lancia Ypsilon. En hann hafði skemmtilega fítusa t.d. er hægt að kippa hliðarstefnuljósunum úr án nokkurs vanda. Þetta lærðum við á skemmtilega háttinn, þegar við stoppuðum á bensínstöð nokkurri þá sáum við að það var dottið úr öðru megin. Frábært eftir klukkutíma keyrslu - gæði! En svo annar fítus sem er eiginlega enn betri. Jú þegar við vorum búin að keyra hann aðeins á öðrum degi fór Sylvía að vandræðast með það að bílinn var gjörsamlega rennandi blautur fyrir framan farþegasætið frammí. Gólfið gjörsamlega á floti. En ekkert hafði hellst niður. Við reyndum að þurrka þetta eitthvað en ekkert gekk. Svo þegar við skiluðum bílnum tók Alli það fram við konuna sem tók á móti honum að hann væri nú eitthvað dapur þessi bíll og að hann hlyti að leka. Nei, hún fór að hlæja og sagði okkur skælbrosandi að þetta gerðist þegar maður notaði loftkælinguna í einhvern tíma. Sagði okkur svo að við hefðum sloppið vel, hún hefði séð það mun verra hahahahaha. Ehhhh - vinan þetta er ekki sérlega fyndið þegar maður hefur þurft að sitja með fæturna í þessu í tvo daga!

Mælum eindregið með ferðalögum til Króatíu enda gríðarlega fallegt þarna - enn og aftur takk fyrir okkur Húsavíkurmamma- og pabbi.

Núna er hins vegar Gaui Hafnarfjarðarbróðir í heimsókn og verður líklegast fram að jólum. En eins og þeir sem þekkja til hans vita, krefst það gríðarlegrar þolinmæði að hálfu okkar Alla. En við skelltum okkur með honum til Berlínar síðustu helgi og koma því myndir af því næst þegar Alli neitar að koma heim úr vinnunni.

Up and away,
Sylvía & Alli

Salsa

2006-09-23T15:12:00.000+02:00

Við skötuhjú skráðum okkur í salsa núna í ágúst og fórum svo í fyrsta tímann í gærkveldi. Hæstánægð með tímann enda skemmtum við okkur mjög vel - getum samt ekki annað en vorkennt kennaragreyjunum. Það tók þá rúman klukkutíma að kenna okkur grunnsporin. Eftir að hafa náð grunnsporunum var farið í flóknari hluti. Oh my, að reyna að dansa þessi grunnspor á meðan Alli reynir að kyrkja mig með mínum eigin höndum - tja, ekki svo létt skal ég segja ykkur.

Við náttúrulega litum nokkurn veginn svona út..

Maður lifir og lærir,
Sylvía (&Alli)

Má ég fá svona..

2006-09-10T18:04:00.000+02:00

Í dag varð Alli hamingjusamur. Nú gengur hann um með bros á vör og gæsahúð á höndunum. Það er ekki hægt að tala við hann, tja þú getur talað en hann heyrir það ekki. Hann heyrir bara malið í sínum eigin haus. Eina sem hann getur sagt er váááááá..

Sagan er sem sagt svona: við skelltum okkur í tennis, sem er nú ekki frásögufærandi þar sem við gerum það flesta sunnudaga nema hvað í þetta skiptið gerðist nefninlega eitthvað sem ekki hefur áður gerst á leiðinni heim úr tennistímanum. Það leit út fyrir að vera venjulegur dagur, sólin skein, við vorum sveitt og allt pakkað af túristum. En þá heyrðum við það. Ískríð, vælið, malið!

Við stóðum á miðju Wenceslas torgi hálfnuð með heimleiðina þegar við áttuðum okkur á því hvað var að gerast. Ferrari kom keyrandi fram hjá, svo annar, svo annar, svo annar..

Já, það voru greinilega allir Ferrari eigendur Tékklands samankomnir til að rúnta um miðbæ Prag. Og þeir keyrðu beint framhjá okkur, tvisvar. Flestir sem þekkja hann Alla minn eitthvað vita að fáir hafa eins mikinn áhuga á bílum og hann. Því miður fyrir mig þar sem hann vill helst eyða góðum frídegi í að bóna bílinn.

En já, þarna stóðum við umkringd Ferrari og ég er nú ekki frá því að ég hafi séð tár í augum Alla. En það gæti hugsanlega stafað af því að ítalskir ofurfolar (bílar stelpur!) eru þekktir fyrir að bila og það ekkert sjaldan. Jú jú þeir stóðu undir nafni og einn Ferrari bílstjóranna lenti í þeirri skemmtilegu reynslu að skottið (í þessu tileflli hlífin á vélinni þar sem vélin er aftur í á flestum Ferrari bílum) hans opnaðist aftur og aftur. Ítölsku skrapatól! Gaman að lenda í því í miðjum monttúr Ferrari eigenda.

Jæja, ætla að reyna að ná Alla aftur niður á jörðina,
Sylvía

Aftur í skólann..

2006-08-31T18:56:00.000+02:00

Fyrsti dagur skóla hjá mér – gríðarlegt fjör alltaf hreint. Af fimm fyrstu tímunum mínum er nú þegar búið að cancela þremur. Lötu kennarar!

Hitti milli tíma vinkonu mínu sem er á annarri braut en ég (og þar af leiðandi ekki með mér í tímum) og viti menn. Hún lenti með annarri íslenskri stelpu í tíma. SAY WHAT? Ha, er ég ekki lengur sérstaki Íslendingurinn.. damn it!

Næst hitti ég kennara sem kenndi mér á fyrstu önn – hann var nú ekki lengi að segja mér frá því að hann væri að kenna öðrum Íslendingi – stelpa sem heitir Heiða. Þetta er nú bara snilld, ætli maður verði ekki að reyna að hafa upp á henni. Úfff – ég gæti hugsanlega talað ylhýra móðurmálið við einhvern annan en Alla. Get vart lýst því hvað það hljómar þægilega.

Jæja, farin að læra,
Sylvía

Íshellir

2006-08-25T22:13:00.000+02:00

Í vikunni eftir Krítarferð hugsuðum við með okkur að það gengi náttúrulega ekki eftir svona hita í tvær vikur að kæla sig ekki neitt niður. Svo við ákváðum að skella okkur í íshella skoðun í Austurríki. Ekki annað hægt að segja en að okkur hafi kólnað.

Keyrðum sem sagt einn morguninn yfir til Austurríkis og komum að litlum bæ þar sem maður fór eftir bröttum vegi (21%) sem var allur í beygjum upp eftir fjallshlíð. Ferðinni sem sagt heitið að bílastæðum. Eftir að þangað var komið og bíllinn skilinn eftir þá gengum við að kláfi sem fór með okkur upp um 500m. á þremur mínútum sléttum. Reyndum að taka mynd af kláfinum en einhver karlugla stakk hausnum inn á myndina. Þegar við vorum svo kominn úr kláfinum tók við önnur ganga upp að hellisopinu. Þaðan gat maður horft yfir dalinn, enda kominn frekar hátt upp. Ekkert smá flott útsýni yfir þennan kastala og svo fjöllin í kring.

Svo var farið inn í hellana í fylgd með leiðsögumanni, fólk raðaði sér í hópa eftir tungumáli. Okkur til mikillar ánægju og skemmtunar sá leiðsögumaðurinn okkar einhverja ástæðu til þess að tala enskuna alltaf eins og hann var að leika í 18. aldar leikriti.
Tókum ekki myndir inn í hellinum enda var það bannað. Stálumst þó til að taka eina af Alla með skemmtilegu luktina okkar sem sjá má hér.

Þegar við komum almennilega inn í hellisopið sáum við að á hellinum er hurð. Ehh - er það nú ekki óþarfi inn í helli. Svo þegar hurðin var opnuð og maður gekk inn myndaðist enginn smá vindur og það kólnaði all svakalega. Þetta var sem sagt bara kalt loft að reyna að komast út.

Svo gengum við inn í hellinn og gengum og gengum upp endalaust langar tröppur. Eftir heillangt labb og mikið af gapi þá var okkur sagt að við værum komin kílómeter inn í hellinn (vildi að ég gæti skrifað það á jafn skemmtilegan 18. aldar hátt og það var borið fram). Þarna sem sagt var endapunktur og nú farið að vinna sig tilbaka að hellisopinu, þó ekki sömu leið. En hann bætti því við að hellirinn væri lengri en bara ekki ís þar.. bara einhverjum 41 kílómeter lengri!

Alla vega þá getið þið séð myndir hérna. Mælum eindregið með því að kíkja á þennan helli ef þið eigið einhvern tímann leið um Austurríki. Virkilega flottur.

Köttur út í mýri setti upp á sig stýri, út eru ævintýri,
Sylvía & Alli

Krít, been there, done that

2006-08-16T22:28:00.000+02:00

Við komum heim frá Krít síðastliðinn laugardag. Við byrjuðum ferðina á snilldar hátt og gerðumst "Skywalkers". Að sjálfsögðu vísuðum við til okkar þannig það sem eftir stóð ferðar, þó líklegast enginn annar en við skilið húmorinn. Treystum að sjálfsögðu á að Star Wars aðdáendur séu búnir að kveikja. Hérna má sjá ástæðuna fyrir því að við gerðumst "Skywalkers".. við sem sagt gengum yfir skywalk.

Eftir að hafa gengið skywalkið var flogið til Krítar og smellt sér beint á hótelið. Sem betur fer var herbergið okkar laust en við vorum komin á hótelið rétt um sjö leytið. Maður hafði nú hugsað sér að leggja sig en þegar maður var komin á staðinn var ekki um annað að ræða en að skoða pleisið. Við fundum þar þessa æðislegu kettlinga. Það má alveg sjá á meðfylgjandi myndum að þeir fengu næga athygli frá okkur.

Þessi var nú eitthvað þreytulegur..

Þeir voru ekkert lítið spenntir yfir að fá vatn úr flösku og keppst um að komast að..

Að sjálfsögðu er nauðsynlegt að liggja á bakinu þegar maður er svona hvítur á maganum, hvernig á maður annars að taka lit þar..

Að sjálfsögðu þurfa þeir að hjúfra sig saman - enda bara 32°C..

Þeir ættu ekki að vera þyrstir næstu árin..

Ehmm.. Alli ég sé enga eftirrétti!!!

Við skelltum okkur svo til Heraklion en það er höfuðborg Krítar. Þessi göng eru upphafið af gamla bænum og höfninni.

Þeir virðast ekki sérlega færir að leggja bátunum við höfnina..

Enda settu þeir akkerið niður á miðju landi?

Fundum svo þetta flotta hús á höfninni og smelltum okkur inn í það. En Alli greyið týndist í dýflissunni..

Fundum svo leiðina út og upp á húsið þar sem var agalegt útsýni yfir höfnina, en við vildum bara sýna ykkur okkur í staðinn..

Smelltum okkur á kaffihús í Heraklion þar sem Alli ákvað að fá sér vöfflu. Sylvíu til mikillar skemmtunar þá tók hann þá furðulegu ákvörðun að fá sér vöfflu með ís og súkkulaðisósu og svo súkkulaðishake með. Hmmm - hljómar eins og seðjandi blanda. Að sjálfsögðu var hann pakk saddur og neitaði að borða þar til þremur dögum síðar. En damn - vafflan var girnileg..

Hérna koma svo nokkrar myndir frá hótelinu og svæðinu þar í kring - en þar sem við erum ekki sérlega frumleg í vali á myndefni þá erum við á öllum myndum. Þessi er tekin á göngustígnum sem fer frá hótelinu og að ströndinni..

Ströndin hjá hótelinu var alger snilld, sjórinn kristaltær og sandurinn laus við steina. Svo Sylvía gerði heiðarlega tilraun til að pósa í sjávarmálinu en það gekk nú ekki betur en þetta..

Alli að smella sér í eftir göngutúr á ströndinni (Sylvía að reyna að vera agalega listræn)..

Svo náttúrulega til tilbreytingar þá er mynd af okkur saman í kvöldsólinni, einstaklega rómó..

Uss - bara tekið "blue steel" á þetta..

Sylvía og Alli tilbúin á djammið, já gott fólk við fórum á djammið.. erum ekki alveg dauð sko..

Að sjálfsögðu þurfti Alli (oftar en einu sinni og oftar en tvisvar) að monta sig aðeins á tan línunni (sem taldi sig ekki færan um að fá)..

Vona að þið séuð enn að lesa! Alla vega þá skelltum við okkur til eyju sem heitir Santorini. Þegar maður ímyndar sér Grikkland þá er það alltaf hvít hús með bláum hurðum og þökum og heilu bæirnir byggðir í brekku, það er einmitt fullkomin lýsing á Santorini. Gaman að segja frá því að þar sem það er lítið sem ekkert vatn á eyjunni þá treysta þeir á rigninguna á veturna til að sjá fyrir vatni allt árið. Safna rigningarvatni í sértilgerða dalla.

Við semsagt fórum með "flying cat" (snilldar nafn!) sem er sagt nokkuð hraðskreiður bátur. Því miður var ekki sérlega gott í sjóinn þegar við lögðum af stað um morguninn og margir sjóveikir um borð. Mmmm fátt skemmtilegra en að stytta sér stundir við að hlusta á fólk kúgast allt í kringum mann. Því miður þá er Alli nokkuð hrifinn af sjóveiki og ákvað því að taka þátt.. en slapp þó við uppköst. Hann hefur því núna sett markið á engar sjóferðir næstu 10 árin. Hérna má sjá mynd af uppáhalds bátnum okkur..

Hérna er Sylvía stödd í fyrsta bænum sem við stoppuðum í. Ágætis útsýni þarna..

Svo fórum við í bæ sem heitir Pyrgos..

Að lokum var svo endað á að skoða höfuðborg eyjunnar en hún hét Fira. Hérna er Alli á kaffihúsi sem við stoppuðum á. Hef nú ekki farið á stað með svona útsýni á klakanum..

Sylvíu til mikillar ánægju og Alla til skelfingar fann Sylvía fullt af litlum verslunargötum þarna (keypti því miður ekkert og enn miður sín)..

Hérna má svo sjá hlíðina sem höfuðborgin er byggð í..

Í Fira er sem sagt hægt að ganga niður alla hlíðina til að komast að höfninni sem er þar neðst - aðeins 618 þrep. Ehh - nei takk við erum búin að sjá hafnir..

En hægt er að auðvelda ferðina með því að fara á asna. Again.. ehh nei takk, búin að sjá höfn áður..

Síðasta kvöldinu var svo eytt í leti á uppáhalds kaffihúsinu/barnum sem við fundum þarna. En þar voru svona 7000 jólaseríur í gangi og hægt að sitja í rólum. Ó já - sitja í rólum!!! Mr. Motionsickness lagði ekki í róluna.

En Sylvía var friðlaus þar til hún fékk rólu undir rassinn..

Luke, I am your father,
The Skywalkers

Kókoshnetur á ströndinni

2006-07-28T11:56:00.000+02:00

Jæja gott fólk, við höfum ákveðið að yfirgefa Prag. Að vísu bara í tvær vikur
þar sem við erum að fara til Krítar. Munum sem sagt koma til með að fljúga
þangað í nótt. Áætlaður flugtími er klukkan 3:00. Ömurlegur tími þar sem við
rúllum þá út á völl fljótlega upp úr eitt. Sem þýðir að verður ekkert sofið
fyrir flugið. Flugið sjálft er svo 2 tímar og 45 mín. Eins gott að maður reyni
að sofa eitthvað því við lendum rétt fyrir sjö á grískum tíma. Getum svo ekki
tékkað okkur inn á hótelinu fyrr en 12. Frábært 4 tímar til að drepa. Ætli
lausnin sé ekki að vera í bikiníinu innanundir (eða sundskýlu) og smella sér
bara á ströndina - hehe vonum að þeir á hótelinu séu með aðstöðu fyrir
farangurinn :-)

Stefnum á að vera svona..

Aðallega af því að Sylvía nennir helst ekki að labba - segist vera komin í
algert frí.

Farin á ströndina,
Sylvía & Alli

Bráðnað í Prag

2006-07-19T20:14:00.000+02:00

Heilt og sælt veri fólkið. Það hefur ekki margt fréttnæmt gerst undanfarið og því frá litlu að segja. Alli alltaf í vinnunni og Sylvía að farast úr leiðindum. Svo það er lítið að frétta. Hér í Prag er all svakalega heitt þessa dagana. Spáin fyrir morgundaginn hljóðar upp á 37 gráður! Það þýðir að það er vart hægt að vera úti fyrir hita. Maður svitnar við að sitja fyrir framan tölvuna.

Værum alveg til í rana - svo maður gæti kælt sig svona..

Bíðum bara spennt eftir Krítarferðinni - bara 10 dagar þar til við skellum okkur á ströndina.

Alli er komin með hausinn inn í frysti, svo ég ætla að veita honum félagsskap þar,
Sylvía & Alli

Ferðasagan..

2006-07-10T20:23:00.000+02:00

Eins og við sögðum frá í síðasta pósti þá skelltum við okkur í smávegis road trip síðasta miðvikudag. Byrjaði ferðin á því að þegar við komum út í bíl hress og spræk um áttaleytið sáum við að einhver hafði haft fyrir því að stela vinstri speglinum af bílnum. Frábært!

Þar sem að allt var lokað í Tékklandi (frídagur) þá var lítið annað í stöðunni en að reyna að koma bílnum í þessu ástandi yfir þýsku landamærin. Stoppuðum á nokkrum bensínstöðvum og athuguðum hvort hægt væri að fá framlengingarspegla - sem eiga að notast þegar maður er með eitthvað í eftirdragi en því miður virðast Tékkarnir ekkert hrifnir af því og það hvergi til. En okkur tókst að komast yfir landamærin og með dyggri aðstoð stóra bróðurs (Gauja) fundum við Peugeot þjónustustöð í Dresden. Því miður áttu þeir ekki réttan spegil en hins vegar teipuðu þeir einn á.. gríðarlega fallegur frágangur. En það dugði og kom okkur til Hollands. Því miður láðist okkur að taka mynd af því fallega sköpunarverki.

Því næst vorum við mætt til Rotterdam - þar var tekið við að skoða borgina. Röltum um og nutum þess að hafa ekkert á stefnuskránni.. tja nema að redda spegli og mótor fyrir spegilinn (kom svo í ljós að það vantaði líka því hinn brotnaði).

Rotterdam er gjörsamlega öll úr múrsteini eða gleri. Borgin var nánast jöfnuð við jörðu í síðari heimsstyrjöldinni og því öll nýleg. En ekki annað hægt að segja en að borgin sé mjög "welcoming" og allir virtust vinalegir og tilbúnir til að hjálpa. Stærsti munurinn var nú að allir skyldu tala ensku og það bara mjög vel. Það er sko þægilegt eftir að hafa búið í Tékklandi.

Svo strax á fimmtudagsmorgunn fórum við á Peugeot verkstæði. Því miður áttu þeir einungis spegilinn til en ekki mótorinn. Eftir nokkur símtöl og vesen kom í ljós að mótorinn var til í bæ nokkrum sem var í klukkutíma fjarlægð frá Rotterdam. Ekki annað hægt að gera en að hringja þangað og panta tíma í viðgerð.

Eyddum restinni af fimmtudeginum í skoðunarferðir um borgina og í Morgan (ekki til í Prag) svo Sylvía gjörsamlega froðufelldi af ánægju og hvarf inn í búðina, greyið Alli. Annars féllum við alveg fyrir þessum húsum - en gátum ekki annað en velt því fyrir okkur hvernig nýtingin er á þeim. Getur maður t.d. hengt upp myndir vandræðalaust?

Alli fann svo nokkur háhýsi, honum til mikillar ánægju enda gríðarleg skemmtun fyrir þessa elsku að telja hæðirnar.. nei, það verður ekkert þreytt í borg sem er full af háhýsum.

Svo á föstudag var aftur lagt í rúnt til að mixa þennan spegil - enda ekki sniðugt að keyra autobahninn með, tja.. vægast sagt takmarkaða sýn. Að sjálfsögðu spilaði líka inn í að Aðalgeir taldi það náttúrulega heppilegast að keyra ávallt á vinstri akrein á autobahninum svo hann þyrfti ekki að nota spegilinn. Sem sagt að halda sér helst á 170-200 km/klst alla leiðina. Eins og gefur að skilja lagði Sylvía mikla áherslu á að finna spegil fyrir bakaleiðina!

Gekk bara vel að fá spegilinn en bakaleiðin til Rotterdam því miður ekki alveg jafn spræk. Týndumst aðeins á þessum hraðbrautum þeirra. Eins og sjá má er nóg af vegum til að taka..

Svo loksins þegar við komum til Rotterdam var deginum eytt í leti og ís - enda fínasta veður og því nauðsynlegt að borða nóg af ís. Enda eru þeir með Häagen Dazs.

Svo lögðum við af stað til Prag á laugardagsmorgni með nýjan spegil og ennþá þreytta rassa frá fyrri ferðinni. Ferðin byrjaði nú bara vel - alveg þar til við lentum í smávegis teppu á autobahninum í Þýskalandi. Jú, að sjálfsögðu var þung umferð enda Þýskaland að fara að keppa um kvöldið. Þessi "litla" teppa tafði okkur um 4,5 klukkustundir og heildarferðatíminn því 14 klst. Þreyttir rassar voru sko ekki sáttir með þessa meðferð. Bílarnir voru stopp svo lengi að fólk var bara farið út úr bílnum með kaffibollann að spjalla við fólkið í þeim næsta.

Séð fram fyrir bílinn.

Séð aftur fyrir bílinn.

Vonum að þið hafið nennt að lesa þetta allt,
Sylvía & Alli

Road trip!

2006-07-04T15:34:00.000+02:00

Já við ætlum að skella okkur í smávegis "road trip" í fyrramálið. Það er sem sagt 9-10 tíma akstur.. fyrir utan stopp. Erum nefninlega að fara til Hollands og munum vera þar fram á helgi. Stefnan er sett á að gista í Rotterdam og skoða staðinn. Reynum svo örugglega að kíkja aðeins til Amsterdam þar sem það er nú bara klukkutíma akstur á milli.

Á leiðinni til Hollands keyrum við sem sagt í gegnum Þýskaland - úff, Sylvíu kvíðir nú aðeins fyrir því að fara með Alla undir stýri á Autobahninn. Krossleggið fingur og vonið það besta ;-)

Heyrumst svo eftir helgi (með túlípana, tréklossa og þreytta rassa),
Sylvía & Alli

Bíll!

2006-06-28T20:33:00.000+02:00

Já - loksins loksins erum við skötuhjú komin á bíl. Hingað til höfum við verið á einhverju sem aðeins minnti á farartæki (VW Golf). Erum sem sagt núna á Peugeot 607. Eina vandamálið við bílinn gæti verið að leggja honum þar sem hann er tæpir 5 metrar :-)

Erum farin í bíltúr,
Sylvía og Alli

Bjalla í heimsókn..

2006-06-26T11:56:00.000+02:00

Já já, fann eina að skríða um á gólfinu inn í stofu. Ég uppgötvaði nú fyrst hvað ég er farin að linast gagnhvart skordýrum, ég ákvað að drepa hana ekki. Ég er ekki viss um að það hafi verið rétt ákvörðun – því þessi hlýtur að vera að reyna að drepa sig. Í það fyrsta kom hún í heimsókn til mín, sem þýðir fyrir flest skordýr skjótan dauðadaga. En nei ekki í þetta skiptið.

Þá greip bjallan til þess ráðs að klífra upp á dýnuna mína (sem ég var að teygja á). Oks, þessi er nú bara að reyna að lenda undir mér. Ég gríp til þessa ráðs að ýta henni af dýnunni, hún lendir á bakinu.. eftir heillanngt strögl hjá greyinu sá ég fram á að hún myndu ofreyna sig svo ég sneri henni við. Þá klifraði hún strax aftur upp á dýnuna, aulinn!

Núna ákvað ég að setja hana í gluggann, þar er hún enn að staulast um – en hún virðist ekki sérlega fær í að hreyfa sig, hef kíkt þrisvar á hana og í öll skiptin hefur hún verið föst á hvolfi. Ég sný henni alltaf samviskusamlega við. En núna síðast fór ég að velta þessu fyrir mér – ætli þetta sé sjálfsmorðsaðferð bjöllunnar? Klifrar eitthvað aðeins upp og hendir sér á bakið, þannig liggur hún svo föst þangað til hún drepst úr hungri eða hreinlega ofreynir sig og drepst. Hljómar svona svipað gáfulegt og saltát sjálfsmorðs aðferð Japana. Næst held ég að ég snúi henni ekkert við, hendi henni bara í ruslið á morgun..

Farin út í blíðuna,
Sylvía

Sporty Spice

2006-06-23T20:14:00.000+02:00

Nú er mín á fullu í tennis, hitti tenniskennarann á eyju í Vltava ánni (Moldá fyrir Íslandinga). Til þess að komast þangað þarf ég að ganga þvert í gegnum miðbæinn – sem sagt niður Wenceslas square, sem fyrir þá sem ekki þekkja til þá er þetta eins Laugavegurinn á sterum og ekki er hægt að komast að á malbikinu fyrir túristum.

Allt í lagi með það – ágætis labb út af fyrir sig. En núna síðast var um 30 stiga hiti. Það þýðir að maður smellir sér í stuttbuxurnar, íþróttatoppin og strigaskóna. Oks – en þar sem það er sól og ég er með leiðindartopp þessa dagana þá nota ég derhúfu til að halda hárinu aftur. Eða með öðrum orðum ég leit út eins og sporty spice að labba niður í bæ.

Sem betur fer var ég með leðurtöskuna mína á öxlinni til að toppa útlitið – einhversstaðar verða lyklar, sími og peningaveskið að vera. Agalega var ég meðvituð um þetta útlit á mér, og leið hreint ekki svo þægilega.

En ég hafði gönguna af og mætti í tímann. Sem betur fer gekk betur en síðast og ég fylgdi almennilega eftir – axlirnar 90 gráður, alveg nauðsynlegt í tennis. Þegar tíminn var búin lýsir kennarinn því yfir að ég sé öll að koma til og að þetta hafi verið reglulega góður tími hjá mér.

Ég labbaði heim, stolt með derhúfuna mína. Íhugaði meira að segja nokkur handahlaup og svona spörk út í loftið til að undirstrika sporty spice útlit mitt.

Núna set ég að sjálfsögðu markið á Önnu Kournikovu, það er vera frekar döpur í tennis en fá hins vegar flotta auglýsingasamninga :-)

Kveðja,
Sylvía

Letilíf

2006-06-20T14:01:00.000+02:00

Það er lúxus líf að vera námsmaður í Prag, tja alla vega að sumri til. Eða er það.. ? Ég hef núna sex vikur til þess að drepa þar til Alli fer í frí og við til Krítar.
Að sjálfsögðu er fínt að drepa tímann í sólinni með því að flatmaga út í garði og lesa góða bók. Jú jú mín skellti sér í letina í dag. En skyndilega fann ég nú eitthvað lenda á mér - djöfulsins hlussa, virkaði nú bara rakt! Hendist að sjálfsögðu við með tilheyrandi tilþrifum eins og dömu sæmir og smelli höndinni á bakið. Viti menn - það kúkaði fugl á mig!
Að sjálfsögðu hefur helvítið á honum miðað og því hitt á mitt bakið þar sem manni er nánast ógerlegt að teygja sig, þið þekkið staðinn, þar sem manni klæjar alltaf reglulega.

Frábært ég sat því alein og reyndi að teygja mig og reigja með handklæði í hönd til þess að þrífa fuglaskítinn af bakinu - ég að minnsta kosti náði að drepa þó nokkurn tíma með þessu veseni.

Ætla út að worka tannið,
Sylvía

Gaui í heimsókn

2006-06-11T21:49:00.000+02:00

Guðjón stóri bróðir var í heimsókn hjá okkur síðustu tvær vikurnar. Að sjálfsögðu var skellt sér í smávegis ferðalög, sérstaklega þar sem veðrið í Prag var ekki að gera Guðjóni neina greiða. Fórum til Vínar, í göngu í Þýskalandi og svo í Dresden.. enda er Pizza Hut staður þar. Annars ætlum við ekkert að vera að þreyta ykkur með of miklu blaðri og eins og stundum áður þegar við höfum ekki nennt að skrifa þá smellum við inn hrúgu af myndum.

Smelltum okkur fyrst til Vínar - vorum gjörsamlega heilluð enda borgin alveg gullfalleg.

Lítið sætt hús..

Þeir áttu nú alveg eitthvað af ágætis kofum..

Sylvía nennti ekki að labba meira..

Þessi kirkja var full stór - Sylvía náði ekki að hafa alla inn á myndinni, Gaua, Alla og kirkjuna..

Sylvía "had to go into the map"..

Guðjón fann bjór í Austurríki..

Svo enduðum við á Tælenskum veitingastað og fengum okkur að borða..

Eftir að hafa dásamað Vín var aftur farið heim til ylhýra (að vísu skítköldu á þeim tíma) Prag. Og eins og þeir vita sem hafa komið til Prag verður maður að eiga alla vega eina mynd af sér á Karlsbúnni. Guðjón klikkaði nátttúrulega ekki á því..

Fyrst að Prag var svona fúl, alltaf kalt, þá ákváðum við að heilsa upp á Þjóðverjana. Gaui og Sylvía lögðu hausinn í bleyti og ákveðið var að skella sér í göngutúr í Þýskalandi.

Hér má sjá bæinn sem við gengum frá..

Hér erum við rétt lögð af stað..

Það var agalega flott að horfa yfir frá toppnum..

Kannast ekki allir við "hvar er Valli?" Getið þið fundið klifrarann..

Myndi ekki vilja skipta um stöðu við þetta tré..

Eftir að hafa farið í gönguna fundum við þennan skemmtilega kastala sem er byggður upp á fjallstindi. Að sjálfsögðu fórum við og athuguðum staðinn.

Alli var agalega ánægður þegar hann fann þessa. Sylvía er enn að reyna að sannfæra hann um að hann sé á réttri syllu atvinnulega séð..

Ehmm.. fannst þessi bara flott..

Alli og Gaui nenntu ekki að fá Sylvíu með heim..

Svo var endað í Dresden og skoðað Zwinger höllina..

Tschuss,
Sylvía & Alli

Ambiente

2006-05-26T21:23:00.000+02:00

Allt gott að frétta úr Prag. Sylvía búin í prófum.. því miður engar einkunnir komnar strax. Einnig er Gaui kominn í heimsókn. Hann hefur nú komið til Prag áður en virðist ekkert kannast við nema botninn á bjórglösum og eitt sund. Þóttist nú kannast við Karlsbrúna en við drögum það nú í efa.

Sylvía og Gaui hafa verið í tennis núna og Sylvía strax sannfærð um að hennar tíma sé best varið í þetta nýja sport. Hún er því að pæla að gerast atvinnumaður í tennis og hætta þessu háskólaveseni.. eða ekki.

Annars vorum við að koma inn úr mat. Rif, vængir, súkkulaði fondue og fersk jarðaber með ís. Mmmmmmmm.... Fátt sem toppar þennan veitingastað. Liggjum því á meltunni núna. Erum að skoða netið fyrir morgundaginn en við stefnum á að rúlla til Vínar, ekkert okkar hefur áður komið þangað. Því miður hefur ekki tekist að finna Pizza Hut stað þar, höfum gert dauðaleit á netinu. Að sjálfsögðu forgangsröðum við rétt!

Jæja, ætlum að horfa á Unni Birnu detta,
Sylvía & Alli (& Gaui)

Crap á matseðlinum

2006-05-20T21:24:00.000+02:00

Búin að vera frábær helgi hérna í Prag. Það vill nefninlega þannig til að Sylvía fékk svo kallað take-home final í stærðfræði. Þar sem að þessi stærðfræði er ekki fyrir hvítan kött þá eyddi Sylvía meirihluta föstudags í þetta og við saman svo í dag búin að eyða nánast öllum deginum í dæmin. Gaman að segja frá því að þetta eru bara átta dæmi. Við erum búin með sjö, bara eitt eftir. Tja, já ef einhver er góður í að finna critical points og classify them þá endilega láta okkur vita því við erum með eina "skemmtilega" jöfnu í boði.

Annars var nú gaman að fara út að borða í dag. Skelltum okkur á nýjan stað í hádeginu til að fá okkur eitthvað létt í magann. Leist okkur svona agalega vel á staðinn þar til við sáum eftirrétta matseðilinn.. vorum þá aðeins hikandi. Sylvía rak augun í einn rétt: "Crap with banana and caramel sauce". Ehmm.. hljómar ekki vel! Þarna var gott að geta lesið tékkneskuna fyrir ofan til að vita hvað þetta var - átti víst að vera crepes (pönnukaka). Höfum ekki mikla trú á að túristarnir taki sénsinn á þessum. Einhversstaðar er þýðandi í hláturskasti.

Svo er það síðasta prófið hjá Sylvíu núna á mánudaginn, það þýðir að morgundagurinn verður alveg jafn skemmtilegur og dagurinn í dag. Alli greyið er svo píndur til að taka þátt í öllu, spyrja út úr og reyna að reikna dæmin og svona fjör. Hann er örugglega ekkert minna þreyttur eftir þessa helgi. Svo eftir síðasta prófið á mánudag kemur Gaui strax um kvöldið og svo frí fyrir Sylvía í eina og hálfa viku. Getur ekki beðið! Alli greyið þarf víst að vinna. En getur nú huggað sig við Krít í lok júlí. Erum að sjálfsögðu farin að telja niður.

Þá er því lokið í bili,
Sylvía & Alli

Þarf ekki að þrífa hjá ykkur?

2006-05-11T20:34:00.000+02:00

Lítið að frétta af okkur í bili. Sylvía hefur verið mjög upptekin við að þurrka af þvottavélinni, skipta um á rúminu og skúra undir því í leiðinni.. er að íhuga að fara að umpotta núna. Rétt að taka fram að fyrst þarf hún að kaupa blóm. Jú, það er rétt skilið hjá ykkur prófin byrja næsta þriðjudag.

Annars er lítið sem drífur á okkar daga fram að prófum, skrifum þegar þau eru búin. Enda verður Gaui stóri bróðir kominn í heimsókn þá :-)

Farin að borða,
Sylvía & Alli

Krít

2006-04-29T17:10:00.000+02:00

Þá erum við búin að bóka ferð til Krítar í sumar. Já, það er um að gera að ferðast eins mikið og hægt er þegar maður er staðsettur svona í mið-Evrópu. Ætlum sem sagt að fara í lok júlí og dveljast þar í tvær vikur. Markmið ferðarinnar að sjálfsögðu að vera eins löt og hægt er - með áherslu á að liggja á ströndinni eða til að breyta til, á sundlaugarbakkanum.

XAIPETE,
Sylvía & Alli

París!

2006-04-21T20:34:00.000+02:00

Við skötuhjú eyddum páskunum í París og gætum vart verið ánægðari með ferðina. Það verður að viðurkennast að Frakkarnir kunna sko að baka! Við vorum líka dugleg við að fullvissa okkur um að þeir kynnu það allir og heimsóttum því eins mörg kaffihús og bakarí og við gátum. Látum nú myndirnar tala sínu máli..

Alli átti rosalega erfitt með að velja!

Sylvía alltaf jafn hrifin af bleikum trjám!

Alli missti ekki af neinum tækifærum til að grípa einhver frönsk góðgæti (já og hann dýrkar pönnukökur eða crepes eins og Frakkarnir kalla það)!

Sylvía og Herra Eiffel urðu rosa góðir vinir - en hvor er stærri?

Tja, þarna erum við í 300 metra hæð yfir París. Herra Eiffel er kannski aðeins stærri.

VÁÁÁÁÁÁÁÁÁÁÁÁÁ!!!! Sylvía er alltaf jafn flott!

Ekkert smá flottur staður rétt hjá hótelinu!

Sjáið þið svipinn?

Þeir sem hafa lesið bloggið muna kannski eftir loforðinu hans Alla - þetta er módelið af því sem koma skal!

Louvre safnið er hrikalegt. Við vorum þar inni í 3 tíma og skoðuðum kannski 20% af því!

Fundum þennan skemmtilega pýramída fyrir utan.

Og já, það rigndi líka smá á okkur..

Alla til mikillar gremju þá er þetta liðið sem Sylvía heldur upp á í formúlunni - og já, þeir unnu í fyrra..

Bitinn með bitanum!

Rómantísk sigling á Signu..

..alveg þangað til þessi gaur ákvað að stilla sér beint í veg fyrir okkur!

En við fundum okkur bara eitthvað betra að gera!

Au revoir,
Alli & Sylvía

Vissir þú að...

2006-04-06T21:51:00.000+02:00

Prag er oft kölluð fallegasta borg Evrópu!
Tékkland er ekki lengur hluti af Tékkóslóvakíu (full ástæða til að minna fólk á það enda Tékkóslóvakía ekki til)!
Þeir hafa miklu flottari gæludýrabúðir, það er til dæmis hægt að kaupa litla apa!
Hitinn fer oft yfir 30°C á sumrin og þykir ekkert tiltökumál!
Hitinn fer oft undir -15°C á veturnar og þykir ekki heldur neitt tiltökumál!
Það eru villtar leðurblökur í almenningsgörðunum!
Hæsta fjall Tékklands heitir Snezka og er 1602 metrar – og við höfum klifrað það!
Það er pöbb á toppinum!
Tékkland er með hættulegri löndum Evrópu til að keyra í!
Lofthæðin í íbúðinni hjá okkur er 3,30 metrar!
Í Tékklandi snúa allir ljósarofar öfugt – hvað er það???
Að ef þú ætlar að skipta klinkinu þínu úr sparibauknum þá kostar það 260kr!
Þú þarft samt sem áður að sortera klinkið sjálfur áður en þú ferð í bankann!
Tékkar vita ekki hvað uppþvottabursti er nota aldrei slíka!
Tékkar kaupa frekar G-mjólk heldur en venjulega og drekka bara eins og ekkert sé!
Að í Tékklandi færðu bara dökkbrúnt/grátt brauð sem er vont!
Þó svo að suðusúkkulaðið þeirra bragðist bara ágætlega þá verður það vont þegar maður býr til heitt súkkulaði – hvernig virkar svoleiðis?!?
Alli og Sylvía eru búin að búa í Tékklandi í heilt ár í dag!

Celeb boyfriend!

2006-03-29T19:40:00.000+02:00

Má nú til með að monta mig aðeins af karlinum. Það kom nefnilega rosa grein í Prague Post (fréttablað á ensku gefið út í Prag) þar sem var viðtal við Allann minn og svo þessi líka flotta mynd af honum. Greinina má finna hér. Rétt að taka fram að myndin var miklu stærri í blaðinu - ekkert smá flott!

Kveðja,
Stoltust

Ráðgáta dagsins

2006-03-19T19:24:00.000+01:00

Getur einhver útskýrt fyrir okkur hvernig vespa getur skyndilega birst heima hjá manni sprellifandi. Hérna er semsagt sagan: Sylvía og Alli komu heim dag einn og fara inn í eldhús. Rétt er að taka fram að á þessum blessaða degi var snjókoma líkt og undanfarna viku og hiti búinn að vera undir frostmarki frá því fyrir jól. Þegar þau standa inn í eldhúsi sér Sylvía skyndilega eitthvað kvikt fyrir neðan eldhúsgluggann - við nánari athugun kom í ljós að um var að ræða risastóra og vel spræka vespu.

Nú spyrjum við ykkur: Hvernig gat vespan komist inn? Hvernig gat hún verið lifandi á þessum árstíma og afhverju í fjáranum þurfti hún endilega að koma inn til OKKAR?

Allar kenningar vel þegnar,
Sylvía & Alli

Starfsmaður óskast

2006-03-09T22:06:00.000+01:00

Snillingur óskast í hlutastarf hjá Alla og Sylvíu í spennandi starfsumhverfi sem gefur mikla möguleika á þróun í starfi.

Hæfniskröfur
- Mikill stærðfræðilegur skilningur
- Doktorsgráða í stærðfræði er kostur en ekki krafa
- Mjög góð enskukunnátta
- Einstök þolinmæði og vilji til að takast á við ný og krefjandi verkefni
- Varalestur kostur

Starfslýsing
Starfið felur í sér að mæta í stærðfræðitíma á fimmtudögum á milli 18:30 - 21:15 og reyna að túlka og skilja kennarann. Kennarinn er því miður ekki hrifinn af því að tala upphátt og vill frekar hafa samanbitnar tennurnar (á meðan talað er) þegar á kennslustund stendur. Ekki er mælt með að spyrja kennarann spurninga þar sem það hefur slæmar afleiðingar, t.d. tekur það sérlega langan tíma og sjaldnast fást skiljanleg svör. Stærsta áskorunin er svo að reyna að gera stærfræðina skiljanlega fyrir Sylvíu.
Einnig gætu fylgt starfinu smávægileg þrif.

Kaup og kjör
- Frí afnot af gestaherbergi Alla og Sylvíu í Prag
- Akstur úr skóla (þegar Alli nennir)
- Lyklar að kústaskápnum, vinsamlegast aldrei læsa honum þó
- Ásamt því að fá að umgangast Alla og Sylvíu flest alla daga!

Áhugasamir vinsamlegast setjið inn nafn ykkar í Athugasemdir.

Sylvía & Alli hf.

Bolludagur!

2006-03-01T21:51:00.000+01:00

Það var sko bolludagur í Prag þrátt fyrir að kjánarnir sem búa hérna viti það ekki. Þannig að við Alli neyddumst til þess að sjá um bollubaksturinn fyrir hönd Tékklands. En þar sem þeir þekktu ekki siðinn borðuðum við líka bollurnar fyrir hönd Tékklands... mmmmmm!!!

Annars saknar maður rosalega saltkjötsins sem við fáum því miður ekki hérna. Við lifum það nú væntanlega af en það þýðir að við munum ekki fasta eins og við gerum fastlega ráð fyrir að allir geri á Íslandi.

Annars er nú ekki svo margt að frétta héðan en gaman að segja frá því að núna er Sylvía byrjuð í jóga á laugardagsmorgnum og þarf því að vakna um upp úr átta og að sjálfsögðu er Alli dreginn fram úr og hent með í ræktina. Nema hvað að jógað er svona að mestu leiti á Tékknesku og hefur þetta því verið meira en bara kennsla í jóga - alltaf gaman að áætla svona cirka hvað kennarinn er að segja. Sérstaklega þegar hún er að lýsa einhverri öndun!

Annars er bara rúmlega sólarhringur í Íslandsför og Sylvía að sjálfsögðu byrjuð að skipuleggja ferðatöskuna, enda alltof skipulögð og "light packer" og það krefst sko skipulags.

Guðjón - áætluð lending er klukkan 15:30 - vinsamlegast ekki gleyma okkur!

Sjáumst vonandi um helgina,
Sylvía & Alli

Ísland

2006-02-16T22:35:00.000+01:00

Þar sem við eigum svo erfitt með að bíða svona lengi eftir að komast til Parísar höfum við ákveðið að fara í aðra ferð fyrst. Já við ætlum í helgarferð til Íslands! Komum sem sagt á klakann 3. mars og förum strax aftur þann 6. Þetta er nú að vísu í tilefni árshátíðar hjá Creditinfo Group en það vill einmitt svo skemmtilega til að hann Alli vinnur einmitt fyrir þá.

Ísland - ylhýra Ísland

Nú verður náttúrulega reynt að troða inn eins mörgu og hægt er þennan stutta tíma, föstudagskvöld og sunnudagskvöld. En að sjálfsögðu gengur fyrir að sjá Önnu Theodóru litlu frænku Sylvíu (dóttir Möggu frænku) þar sem hún var ekki á landinu um jólin.

Sem betur fer þá hefur Alli endurheimt heilsuna og því búið að afturkalla tappana frá EU sem hann hringdi í til að athuga hvort nokkuð væri um að ræða H5N1.

Hafið þið tekið eftir því hvað við erum dugleg að blogga undanfarið? Viljum nú fá smá credit fyrir - eða eru kannski allir löngu hættir að nenna að kíkja?

Yours truly,
Sylvía & Alli

Eftir 62 daga

2006-02-11T20:07:00.000+01:00

Já það eru bara 62 dagar í að við skötuhjú skellum okkur til Parísar. Við erum búin að bóka flug og hótel og getum ekki beðið eftir að fara. Fyrsta skipti fyrir okkur bæði. Það verða sko rómantískir páskar þetta árið! Hlökkum svo til að standa þarna!

Annars er lítið af frétta af okkur í bili. Alli er lasilíus og því lítið sem ekkert gert þessa dagana. Sylvía byrjuð i skólanum og það lítur út fyrir "fun filled" önn hjá henni - stærðfræði, hagfræði og svo lögfræði ásamt öðrum gríðarlega spennandi áföngum.

Eyðum bara tímanum núna í að skoða ferðir fyrir sumarið - Grikkland situr á toppinum núna en auðvitað er fuglaflensan komin þangað svo eitthvað gæti það skolast til. Alli er náttúrulega svo paranoid yfir öllu svona að hann er nánast farin að ganga með gasgrímu daglega og með dósamat í hanskahólfinu.

Farin að fá okkur heita eplaköku með rjóma - eins og alltaf þá eru allir velkomnir sem vilja sneið,
Sylvía & Alli

-18°C ALMÁTTUGUR

2006-01-23T10:57:00.000+01:00

Get ekki annað en sett inn smávegis færslu vegna þess hversu HRIKALEGA KALT er í Prag í dag. Það voru -18°C þegar ég fór í vinnuna í morgun og ég er bara ekki viss um að ég hafi stigið út í slíkan kulda áður, ever!

Bíllinn var alls ekki sáttur við þetta og þrátt fyrir að starta sér fljótt og vel þá þurfti ég að eyða 10 mínútum í að hita hann upp þannig að olíuljósið kviknaði nú ekki í hvert skipti sem ég snerti bensíngjöfina. Geri ráð fyrir að olían hafi verið orðin svo þykk í kuldanum að hún hafi ekki skilað sér nógu hratt inn á vélina!

Já, mig rámar sællar minningar í að hafa sett inn færslu um hitann í Prag einhverntíman. Ég vona svo sannarlega að sá tími komi aftur ;-)

Bestu kveðjur,
Alli

P.S. Sylvía: Við verðum að byrgja okkur upp af heitu súkkulaði!

Mont mont og meira mont!

2006-01-19T20:36:00.000+01:00

Jæja, loksins loksins hafa okkur borist einkunnir frá skólanum hennar Sylvíu. Og þar sem henni gekk vel fannst okkur að sjálfsögðu tilvalið að smella þessu á síðuna - tja svo spilaði líka þátt að Alli hafði í hótunum með að setja sjálfur inn færslu og hann er svo hátíðlegur að ég tók enga sénsa.

Einkunnirnar eru sem sagt gefnar á forminu A - F. Eftirfarandi eru einkunnirnar sem sagt (og eins og þær útleggjast samkvæmt íslensku kerfi fyrir aftan):

Stærðfræði B- (8)

Trúabragðafræði B+ (9)

Rekstrarhagfræði A (10)

Composition (ritgerðasmíð) A (10)

Tölvu upplýsingafræði A (10)

Meðaleinkunn: 9,4

Sem þýðir að nú bíð ég bara spennt eftir pakka þar sem Alli var búinn að lofa mér óvæntri gjöf ef ég fengi þrjú A eða fleiri!

Bæ í bili,
Einstein & Alli

Pajama chef

2006-01-15T20:44:00.000+01:00

Matreiðslumeistarar - já, við gerðum þá uppgötvun í kvöld að við erum framúrskarandi kokkar. Við elduðum nautafilet með tilheyrandi. Ef það hafið séð Hómer slefa í Simpsons þá vitið þið hvernig við erum núna! Mmmmmmm beef filet....

Annars er vandamál í gangi hér hjá okkur Pragbúum. Alli upplifði nefninlega svolítið magnað fyrirbrigði um daginn - náttbuxur. Já, ég ákvað að fá Alla til að fá sér náttbuxur því ég nennti ekki lengur að hlusta á hann kvarta um að hann ætti ekkert til að fara í þegar ég henti mér í mín náttföt - þegar við erum löt fram í stofu. En núna neitar hann að fara úr þeim og ég fæ hann varla út lengur. Hefur einhver góð ráð hvernig ég get sannfært hann um að fara út? Nammi virkar ekki einu sinni! Góð ráð dýr því ég þarf að sannfæra hann um að fara í vinnuna á morgun.

Annars er lítið að frétta af okkur. Bíðum enn eftir að fá úr prófunum mínum, þeir eru ekkert að flýta sér hérna. Svo byrjar skólinn ekki fyrr en 6 feb. þannig að ef einhverjum leiðist á Íslandi þá þigg ég félagsskapinn!

Kveðja,
Sylvía & Pajamaman

Bananaterta!

2006-01-13T20:17:00.000+01:00

Vorum að prófa nýja uppskrift af bananatertu - bananar, rjómi, kókosmjöl og súkkulaði. What can go wrong?!? Allir velkomnir að koma og fá að smakka!

Kveðja,
Bakarameistarar

Gleðilegt nýtt ár!

2006-01-04T20:56:00.000+01:00

Jæja þá erum við skötuhjú aftur komin til Prag eftir alltof stutta heimsókn á klakann. Því miður náðum við ekki að hitta alla sem við vildum. Tíminn bara hreinlega gufaði upp. Við komumst að þeirri niðurstöðu að við værum greinilega búin að vera alltof lengi erlendis þar sem að við fengum tvær myndabækur um Ísland í jólagjöf - við munum sko alveg hvernig það lítur út!

Verðum víst að biðjast afsökunar á því að þetta árið sendum við engin jólakort. Sylvía var í prófum þar til rétt áður en við fórum á klakann og Alli hefði hvort eð er aldrei munað eftir þeim. Lofum að bæta úr þessu á næsta ári og vonum að enginn hafi orðið fyrir alvarlegri tilfinningaröskun vegna þessa.

Það er nú alltaf gott að að komast heim í eigið rúm eftir að dveljast annars staðar. Maður upplifði það nú eiginlega fyrst núna að Tékkland væri að fara aftur heim. Þó svo það hafi verið rosa erfitt að kveðja familíurnar aftur. En home sweet home og þegar til Tékklands var komið var allt við sama heygarðshornið þar. Jú það var búið að stela hjólkoppunum af bílnum, þannig að allt var eins og það átti að vera. Það er svo mikil þjófamenning hérna að við erum sannfærð um að þýfi seljist á hærra verði en beint úr búðinni!

Nýárskveðja,
Sylvía & Alli

Proffinn minn!

2005-12-20T11:12:00.000+01:00

Já, vildi bara láta ykkur vita að Sylvía er að rúlla upp þessum skóla sem hún er í. Búin að fá úr einu prófi (hagfræði) og var með A í einkunn og hæst í prófinu!

Yfir & út,

Alli

Veselé Vánoce

2005-12-18T11:59:00.000+01:00

Nú er komin jólastemming í okkur! Það kyngir niður snjó hérna, snjóaði allan gærdag á meðan við vorum að redda afganginum af jólakaupunum. Fullkomið veður þegar maður er í svoleiðis leiðangri. Við erum þá búin að redda öllum gjöfum fyrir utan eina og það er ekki enn víst hvað það verður. Erum víst pínu tæp á tíma.

Nú eru einungis fjórir dagar í að við fljúgum á klakann. Erum komin með hörkufiðring í magann. Að vísu gæti það verið af því að við bökuðum jólakökur í alltof miklu magni og erum að reyna að klára þær áður en við förum á klakann.

Að allt öðru þá kláraði Sylvía prófin síðasta föstudag - ekki er þó víst að lokaeinkunnir verði fáanlegar fyrr en eftir jól. Hvað eru þessir kennarar að reyna að gera manni?!?

Mamma og pabbi (Sylvíu) til hamingju með 23 árin í dag - meirihluti ævi ykkar, það er árangur!

Sjáumst eftir nokkra daga,
Sylvía & Alli

Thanksgiving

2005-11-26T19:22:00.000+01:00

Þá erum við búin að upplifa snjó hérna í Prag. Varla nóg til þess að þekja fermeter en snjór engu að síður. Að sjálfsögðu var myndavélin rifin upp og myndað eins og sjá má. Þar sem að það er farið að kólna þó nokkuð þá eru allir smáhundar hérna í Prag í úlpum. Stundum hvarflar það nú að manni að það sé eytt meira í úlpur fyrir hundana en eigendurna.

Annars var gærkvöldið hörku gott hjá okkur. Ed og Iva, vinafólk okkar hérna, ákváðu að vera með ekta amerískt Thanksgiving. Ed er kani og því alvanur og Iva bjó í sjö ár í Bandaríkjunum. Ed sá víst um eldamennskuna og við fengum að heyra það aftur og aftur fyrst að maturinn heppnaðist vel. Í boði var að sjálfsögðu fylltur kalkúnn eldaður eftir öllum reglum og svo skyldu meðlætið, sem sagt kartöflumús, "gravy", trönuberjasulta (ekki spyrja - þetta var víst algjör nauðsyn) og fylling.

Maturinn var rosalega góður og þegar maður var gjörsamlega búinn að troða sig út kom í ljós að það var líka eftirréttur. Úffff!!! Það er sko ekkert grín að borða á ameríska vísu. Ed og Iva eru samt alveg magnaðir gestgjafar þar sem þau reyndu eins og þau gátu að þröngva afgöngunum upp á alla gesti þegar verið var að fara. Held að þeim hafi bara ekki langað í meiri kalkún. Erum strax farin að bíða eftir Thanksgiving á næsta ári!

Kveðja,
Sylvía & Alli

Guten Tag Dresden

2005-11-13T19:07:00.000+01:00

Við skötuhjú ákváðum að skella okkur til Dresden í gær og heilsa þar meðal annars upp á Frúarkirkjuna og Pizza Hut.

Pose.

Bitinn minn í borginni.

Hérna er svo aðal djásnið - Frúarkirkjan. Þeir voru að ljúka við að endurbyggja hana og takið eftir því að dökku steinarnir eru upprunalegu steinar byggingarinnar sem sprengd var í loft upp. Getið séð myndir af henni fyrir enduruppbyggingu hér.

Næstum því Karlsbrúin :-)

Gaman að minnast á það að á þessum markaði voru að minnsta kosti 15-20 Bratwurst salar!!! Ojjjj

Sylvía sá þessi skötuhjú og smellti sér að sjálfsögðu þeirra á milli.

Kveðja,
Sylvía & Alli

Loksins!!

2005-10-26T21:22:00.000+02:00

Loksins tókst okkur áætlunarverk okkar. Við erum búin að berjast við þetta lengi en aldrei náð alla leið - þó verið nokkuð nálægt í nokkur skipti. Við höfum ekki bloggað núna í heilan mánuð og hefur það aldrei náðst áður! Viljum við þakka fyrir gríðarlega hvatningu sem við höfum fengið til stuðnings þessa áætlunarverks okkar, við hefðum ekki getað það án ykkar.

Nóg um það! Þar sem við höfum ekki bloggað svo lengi höfum við heldur ekkert sagt ykkur frá síðustu heimsókninni sem við fengum en mamma og pabbi frá Húsavík smelltu sér til okkar fyrir ekki alls löngu og höfðu að við teljum gaman af. Við gerðum það að minnsta kosti og hlökkum til næstu heimsóknar.

Markverðast í heimsókninni þeirra verður að teljast ferð í minnsta bæ Þýskalands, Eppendorf, en þar dvaldi mútter á æskuárum. Sökum smæðar bæjarins tók nú smá stund að finna hann en tókst að lokum. Þá hófst mikil leit að húsinu sem dvalið var í þarna á eftirstríðsárunum og eftir gríðarlega leit kom í ljós að það var í raun fyrsta húsið sem við sáum þegar við keyrðum inn í bæinn og var eflaust í kringum 1000 fermetrana. Allt tókst þetta þó að lokum.

Rétt eftir að gamla settið hafði yfirgefið landið kom Ragnar nokkur Miguel Herreros í landið og að sjálfsögðu var skellt sér niður í bæ (Sylvía: Raggi ef þú lest þetta þá skuldarðu mér enn þá kareoke!!).

Síðasta helgi var rosaleg hjá okkur! Fórum með vinnunni í "afslöppun í sveitina". Var semsagt helgarferð í fjöllin þar sem gist var í - tja, spes aðstöðu. Stórt og mikið hús þar sem sungið var og trallað fram á nótt. Næsta morgun var svo skipulagður einhver göngutúr um fjöllin, það var að minnsta kosti það sem við héldum. Síðar kom í ljós að um var að ræða 25 KÍLÓMETRA göngu á hæsta tind Tékklands! Þetta fannst þeim greinilega ekkert rosalegt og virtust allir vera til í þetta. Sæi þetta fyrir mér í íslensku fyrirtæki!

Við komumst reyndar fljótt að því hvernig þeir fara að þessu. Kapparnir eru með pöbba út um allt - og þá meinum við virkilega út um allt! Einn af þeim mátti finna uppi á hæsta tindinum og fjórum sinnum á leiðinni var sest inn á pöbb, pantaður bjór (tja, vatn fyrir okkur) og fengið sér að borða. Þetta er því engan veginn sambærilegt við að ganga einhverja 25 kílómetra á klakanum þar sem maður er himinlifandi ef maður finnur lækjarsprænu til að svala þorstanum. Einnig verður að taka fram að stór hluti af leiðinni var ýmist hellulagður eða malbikaður. Manni varð nú bara hugsað til hringvegarins á Íslandi, ef hann bara væri allur svona góður.

Já, talandi um þessa ferð, þá skruppum við til Póllands um helgina! Hluti af þessari göngu var á mörkum landamæra Tékklands og Póllands og því nauðsynlegt að taka skrefið yfir. Þetta var að sjálfsögðu gert án allra skilríkja og við því kolólöglegir innflytjendur þarna um tíma. Einnig var skítuga búllan (sem tók þó örugglega 150 manns í sæti) Pólsk og þess má geta að þar fengum við þá ógeðslegustu hamborgara sem við á ævinni höfum smakkað! Fólk getur því sleppt þeim stað í heimsókn til Tékklands - muna það - en ekki toppnum samt.

Ekki það að við höfum séð neitt uppi á toppinum eða megninu af leiðinni ef svo ber undir. Það var þessi svarta svarta þoka þannig maður vissi ekkert hvað var í kringum okkur. Það má einmitt sjá mynd af okkur í þokunni - köld og barin af slagviðrinu sem reyndi sífellt að feykja okkur niður hlíðarnar á leiðinni upp. Sáum síðan póstkort sem sýndu þetta líka rosalega útsýni og fallegar hlíðar. Við verðum bara að trúa því að svo hafi verið. Erum ekki alveg á leiðinni að ganga þarna upp alveg á næstunni.

Jæja, borgarlífið tekið við og við bara nokkuð sátt með það.

Bestu kveðjur,
Alli & Sylvía

Karlstejn

2005-09-26T20:01:00.000+02:00

Síðasta laugardag fórum við í góðra vinahópi til Karlstejn á heljarinnar miðaldarhátíð. Karlstejn er sem sagt smá þorp fyrir utan Prag sem er rosa frægt fyrir kastalann sinn enda er alveg magnað að sjá hann efst uppi í hlíðinni fyrir ofan bæinn. Er það einmitt kastalinn hér fyrir ofan.

Megin þema hátíðarinnar er að fagna uppskeru nýs vínsárgangs og því básar að selja smakk af hinu og þessu safti. Já, við skötuhjú skelltum okkur á vínsmökkunarhátíð, drukkum þó ekki djarfari hlut en Fanta. Ferðafélagar okkar voru þó hörkuduglegir að smakka og af mikilli fórnfýsi drukku alltaf fyrir okkur líka.

Við gerðumst hins vegar rosalega huguð þegar kom að þvi að borða hádegismat. Við fórum á stað þar sem var verið að steikja heilt svín á teini. Sáum t.d. einn við borðið okkar gæða sér á hófunum OOOJJJJ! Það þýðir ekkert að skjóta á okkur með hrútspunga og slíkt þar sem við höfum nú vit á því að borða ekki svoleiðis ósmekklegheit. En þið getið séð á myndinni kjötið sem við fengum, það liggja meira að segja hófar þarna á borðinu og svo er verið að steikja svín í bakgrunninum.

En Tékkar eru nú svo skemmtilegir að þetta borða þeir með gráu brauði (þeir borða bara grátt brauð) og svo sinnepi að því ógleymdu að þetta er svo borðað með puttunum. Ekki fyrir dömur með langar neglur, var heila eilífð að þrífa undan nöglunum á mér. En engu að síður var svínið bara gott.

Enduðum svo ferðina á burtreiðum þar sem 5 riddarar kepptust við að sýna listir sínar. Það var ágætis skemmtun en þar sem kynnirinn og knaparnir töluðu alltaf á tékknesku vissum við ekkert hvað var í gangi, en Tékkarnir hlógu voðalega mikið reglulega svo þetta var greinilega stórskemmtilegt svo við fórum sátt heim.

Það sem eftir stóð eftir daginn var það að Sylvía er orðin alveg veik. Hún sér í hillingum fyrir sér að eiga heima í stórum kastala og er farin að pressa mikið á Alla að finna einn slíkan. Alli hefur því legið yfir fasteignablöðunum undanfarna daga en merkilegt nokk þá virðist ekki vera mikið framboð af kastölum þessa dagana. Því stefnir allt í að reistur verði nýr kastali og þar með sá fyrsti á þessari öld. Ef þið vitið af góðri lóð (helst með þokkalegu síki) þá endilega látið vita. Eina sem hefur fundist á þokkalegu verði hingað til er Grímsey en það virðist ekki uppfylla drauma dömunnar.

Farin út að leita að þrælum,
Sylvía & Alli

Minigolf

2005-09-14T19:39:00.000+02:00

Það er einstök upplifun að fara í minigolf í Prag. Við skötuhjúin ákváðum að smella okkur í minigolf einn laugardaginn. Kom okkur á óvart að það reyndist ekkert sérlega auðvelt að finna völl hérna - ágætlega faldir.

Fundum þó einn sem var ágætlega auglýstur og ákváðum að taka einn hring. Það kom fljótt í ljós að Tékkar eiga fleiri fornminjar en Karlsbrúnna. Kylfan var líklega eitthvað sem fengið var frá tímum Stalíns og völlurinn án efa gerður töluvert fyrir hans tíma. Það vantaði ekki - þetta var virkilega flott .. fyrir svona 90 árum. Þarna virtist ekkert hafa verið gert síðan þetta var reist og ekkert viðhald átt sér stað.

Jæja, það þýddi ekki að pæla í því. Boltanum var stillt upp og kylfan munduð. Það sem gerðist svo á sér líklega einhverjar eðlisfræðilegar skýringar en kúlan var svo langt frá því að rúlla í þá stefnu sem kylfan hafði ætlað henni. Brautin reyndist svo arfaskökk og sprungin, enda búin að þola tímana tvenna, að það var lífsins ómögulegt að áætla hvert kúlan færi. Þar sem brautin var steypt og það sem einu sinni hafði líklega verið einhver gervigrasmotta lööööngu gufuð upp var heldur ekki mögulegt að sjá hvar þessar misfellur voru.

Til að gera langa sögu stutta þá var engin forgjöf lækkuð í þetta skiptið. Annars er merkilegt hvernig Tékkarnir eru gagnvart þessu. Við höfðum á tilfinningunni að þarna mættu kannski 3 menn til að spila í hverjum mánuði en samt halda þeir þessu gangandi. Hvernig virkar svona? Þarna þarf að taka upp einhverja kapítaliska hugsun - gengur ekki svona.

Sylvía er svo á fullu í skólanum. Það er bara stærðfræði og meiri stærðfræði. Alli ætlaði að sýna takta úr fyrra námi en kom svo í ljós að hann var búinn að gleyma öllu og Sylvía var mun færari. Alli er núna búinn að kaupa sér reiknivél. Annars er Sylvía orðin ansi gróf í þessu. Ég vaknaði við það einn laugardagsmorgunin að Sylvía var farin úr rúminu. Var eðlilega með áhyggjur af þessu og fór á stúfana til að leita að dömunni. Var hún þá ekki búin að læðast að skrifborðinu og farin að reikna í rökkrinu. Þetta er nú ekki eðlilegt! Hún hefði kannski átt að fara í sálfræðina?

Yfir og út,
Alli & Sylvía

Dobrý den

2005-09-05T20:01:00.000+02:00

Já já - við höfum ekki bloggað lengi en við höfum góða ástæðu í þetta skiptið. Hann Alli hefur verið svo upptekinn, sem sagt að vinna í svona 13-14 tíma á dag undanfarna viku og (ótrúlegt en satt) þá hefur þessi klukkutími milli svefns og vinnu ekki farið í að semja blogg. En sem betur fer er þetta mun skárra núna og ég ekki alein alla daga :-)

Glæstur skólaferill Sylvíu hefur nú verið hafinn og fer hún eins og hver annar framúrskarandi heimsborgari með Metro (neðanjarðarlest) í skólann á degi hverjum. Þó svo að einstaka óhöpp eins og að taka lestina í vitlausa átt gerist einstaka sinnum. Slíkum skemmtilegheitum fer þó óðum fækkandi.

Sylvíu líst bara ágætlega á skólann enda eitthvað um áhugaverða kennara. Einn kennarinn var starfsmaður CIA á tímum kalda stríðsins og var hann staðsettur í Rússlandi og njósnaði þar fyrir Bandaríkjamenn. Hann sagði frá því þegar hann var að framkvæma svokallað "drop off" og áttaði sig á því að verið var að elta hann. Hann tók sig þá til og gekk um alla Moskvu og hegðaði sér líkt og túristi. Eftir fjögurra tíma göngu vissi hann að Rússarnir væru farnir að haltra því Rússar voru víst afleitir skósmiðir. Þetta þótti víst ein besta leiðin til að losna við Rússa greyin.

Að allt öðru en við fengum rosa góðar fréttir í vikunni því að mamma og pabbi (Húsavík) ætla að koma til okkar þann 29. september. Okkur er að sjálfsögðu farið að hlakka gríðarlega til. Þurfum að vísu að hreinsa kóngulóavefina af gestarúminu.

Stefnum á að vera duglegri að skrifa - sorry Catia þetta er allt að koma.

Nashledanou,
Sylvía & Alli

Batman returns to Prague

2005-08-16T21:40:00.000+02:00

Ákváðum að fara út í garð hérna hinum megin við götuna til að horfa á eldrautt sólsetrið, rómantísk að vanda. Eftir að hafa setið þar í smá stund fórum við að veita fuglunum sem þarna voru að fljúga nokkra athygli og fannst þeir eitthvað skrítnir - flugu skringilega. Það var væntanlega af því að þetta voru ekki fuglar heldur leðurblökur. Já, við ljúgum því ekki, það eru leðurblökur í garðinum hérna í miðborg Prag! Erum kannski alveg grænir Íslendingar (ekki við öðru að búast) en við bjuggumst ekki við því að sjá leðurblökur í kvöldrómantíkinni. En að sjálfsögðu var það bara enn rómantískara, eins og þið getið ímyndað ykkur.

Algjörlega þessu ótengt þá vildum við endilega sýna ykkur sem ekki komið í heimsókn (næst þegar mamma og pabbi úr HFJ koma í heimsókn) eruð að missa af. Sylvía tók sig til og gerði all svakalega tertu með hvítu súkkulaði, jarðarberjum og rjóma. Að sjálfsögðu lagði Alli hönd á plóg... og borðaði sem sagt vel af henni. Ákváðum að setja mynd af sköpunarverkinu hérna.

Annars hefur ekki margt gerst fyrir utan það að bíllinn okkar fór í ferðalag án okkar. Okkur þótti það verra. En það var víst okkar gleymsku að kenna því lögreglan tók hann og fór með hann í bílageymslu en þar þurftum við að leysa hann út. Alli vildi meina að þetta væri bara góð reynsla þar sem þetta væri eins og æfing þegar að því kæmi að eignast börn og borga þau út úr steininum. Ástæðan fyrir þessu veseni á lögreglunni var sú að eins og við sögðum frá hérna fyrir ekki svo löngu þá eru reglulega þrifnar göturnar hérna og ef maður forðar ekki bílnum sínum fyrir klukkan sjö að morgni þann daginn þá er bíllinn bara fjarlægður og þetta gera %#$% á þeim bara nokkrum sinnum á sumri eins og ekkert sé.

Jæja Alli er farinn að suða um Batman búning - best ég komi honum í háttinn,
Sylvía & Batman

Heitt - mjög heitt

2005-07-29T17:12:00.000+02:00

Já, það er steikjandi hiti hjá okkur þessa dagana. Búið að malla upp undir 35°C og þegar það fer eitthvað upp fyrir 30°C þá fer maður að finna fyrir því. Nutum þess þó á ströndinni í gær þar sem við kældum okkur reglulega í vatninu. Tókum að sjálfsögðu með okkur vatnsflösku sem sett var í frystinn kvöldið áður og hélt það algerlega í okkur lífinu.

Hérna eru þeir duglegir að vökva malbikið þar sem það er farið að bráðna undan hitanum. Alli þurfti að halda fast í Sylvíu þar sem hún ætlaði sér að hlaupa á eftir bílnum í hálfgerðu óráði. Þetta endaði þó allt vel.

Það virðist sem svo að fleiri þoli ekki hitann. Fengum nefninlega óvænta heimsókn. Fundum meðalstóra engisprettu í góðum gír í baðkarinu hjá okkur .. meðan við vorum í því! Þar sem við erum náttúrulega týpískir Íslendingar þá panikuðum við algerlega og fórum á hlaupum út úr sturtunni. Engisprettan var aftur á móti sallaróleg og var ekkert að kippa sér upp við þetta. Blessuð sé minning hennar.

Bíllinn sem vökvar göturnar er kominn aftur - Sylvía er hlaupin út og Alli á eftir..

Köben

2005-07-24T18:15:00.000+02:00

Alveg óvænt þá ákvað Alli að koma Sylvíu sinni á óvart í tilefni tveggja ára samveru þeirra. Smelltum okkur til Danaveldis þann 16. júlí og eyddum fjórum dögum á flatlendinu.

Að sjálfsögðu var byrjað að fara á Strikið, komumst fljótlega að því að verðlagið norðan við Tékkland er nett geggjun. Borguðum tólfhundruð kall fyrir tvo kakóbolla og muffins - hvernig er þetta hægt? Erum víst orðin vön verðlaginu hérna en ferð á kaffihúsið er í það minnsta helmingi ódýrari. Reyndar varð Sylvía ástfangin af kaffihúsinu þar sem heita súkkulaðið var ótrúlega gott. Tveir súkkulaðikögglar sem bráðnuðu hægt ofan í heitri mjólkinni, gerist ekki betra. Danirnir eru meistarar í þessu kaffihúsadæmi, með kökur og meðlæti í gríðarlegu magni.

Borðuðum um kvöldið á Blue Elephant og mælum með því - jafnvel meira út af stemningunni og umhverfinu heldur en sjálfum matnum, hann var þó fínn. Tökum þó fram ef þið farið, EKKI fá ykkur kókosdrykkinn, hann er alveg skelfilega vondur.

Hittum Elín og Tedda á sunnudeginum og voru þau ofurhress að venju. Myndin hérna til hliðar er náttúrlega af þeim og er mjög lýsandi. Þau drógu okkur á "dýrakaffihúsið", a.t.h. ekki af því það var dýrt, heldur af því þar var allt fullt af uppstoppuðum dýrum! Það var þó stemning í að líta þangað þannig við mælum líka með því (ekki EKKI fara niður á klósettið án fylgdar fullorðinna).

Fórum síðan að borða með Elínu og Tedda ásamt Maríu, Emil og Barböru. Sátum á veitingastað við Nyhavn og teljum við þann stað einmitt mest heillandi stað í Köben - alveg must see. Þarna var krökkt af Íslendingum og var það eiginlega allsstaðar sem við komum. Þetta er eitthvað sem er allt öðruvísi en hér í Prag þar sem það gerist kannski á mánaðarfresti (varla það) að maður rekist á Íslending.

Eitthvað fannst okkur Danirnir misskilja tívolíhugtakið. Fórum í hið víðfræga Tivoli við enda Striksins og urðum eiginlega fyrir vonbrigðum. Þetta var mjög fallegt og allt það en í stað þess að vera skemmtigarður með veitingastöðum þá voru þetta veitingastaðir með nokkrum tækjum. Þannig fyrir þá sem eru að leita að mögnuðum tækjum þá skilst okkur að Bakken sé betri. Ef menn eru svo tilbúnir að greiða örlítið meira fyrir leigubílinn þá mælum við með Gardaland á Ítalíu, en það er alvöru græja ;-)

Auðvitað kíktum við einnig á slotið hjá Elínu og Tedda - hittum þar einnig kisa sem var náttúrlega aðalatriðið fyrir Sylvíu. Hann var einstaklega feitur og sést flykkið einnig á myndinni hér að ofan. Stórmóðgaður við Alla þar sem hann settist í stólinn sem tileinkaður var kisa en lét það ekki mikið trufla sig. Hlammaði sér bara ofan á lappirnar og kom sér vel fyrir. Elín og Teddi: Núna erum við búin að koma í heimsókn til ykkar, þið skuldið okkur heimsókn.

Ákváðum að kíkja til Christianiu en komumst að því að við erum algerir heiglar :-) Entumst þarna inni í örstutta stund en vissum eiginlega ekkert hvað við áttum að vera að skoða og hvað við máttum í raun skoða. Biðum bara eftir að einhver rændi okkur og læsti inni í kjallara. Þetta var ekki alveg að gera sig og ákváðum að koma okkur aftur til siðmenningarinnar. Hvað höfum við svo sem að gera í Christianiu - við sem förum ekki einu sinni í ÁTVR.

Að lokum, þá urðum við vitni að stórglæp. Sátum á kaffihúsi að bíða eftir fluginu okkar til Tékklands og tók þá Alli eftir að einhver settist á brún gosbrunns fyrir utan kaffihúsið. Byrjaði sá hinn sami að hella úr kókflösku ofan í gosbrunninn og var hinn grunsamlegasti við þetta allt saman. Forðaði hann sér síðan ásamt förunauti sínum. Eftir 1-2 mínútur fór svo að freyða út um allt í gosbrunninum og kom þá í ljós að kappinn hafði hellt sápu í gosbrunninn! Þegar hann kom svo aftur að sjá afraksturinn náðum við honum á filmu (minniskort) og voru aðferðirnar keimlíkar því sem sjá mætti í Bond mynd, klifrað upp þakrennuna og yfirlitsmynd tekin. Ef einhver vill vera hetja og handtaka stórglæpamanninn þá er hér meðfylgjandi mynd af kappanum.

Þetta var semsagt alveg stórgóð ferð og munum við tvímælalaust heimsækja veldi baunanna síðar. Því miður gafst ekki tækifæri til að heimsækja ættmennin sem búa hinum megin í Danmörku og því alveg nauðsynlegt að gera okkur aðra ferð.

Hej Hej,
Alli & Sylvía

Sylvía byrjuð að keyra

2005-07-06T22:00:00.000+02:00

Merkur dagur í aksturssögu Prag í dag - Sylvía byrjaði að keyra. Þar sem Sylvía hefur varla gripið í beinskiptan bíl síðan í ágúst 2003 var þetta nokkuð stór áfangi.

Það gekk mjög vel að keyra, það var ekki vandamálið. Kannski fullvel því áður en varði vorum við komin á áður ókannaðar slóðir. Alls ekki innan Prag sýndist okkur og lítið sem benti til þess að við værum að nálgast heimkynnin á næstunni. Að vísu verður Aðalgeir að axla ábyrgð á því þar sem hann var víst kominn undir stýri á þeim tímapunkti. Hann var reyndar sannfærður um að við værum á réttri leið. Þetta væri bara smá sveigur í kringum miðborgina og við myndum líklega enda nálægt flugvellinum áður en við færum til baka. Við enduðum ekki nálægt flugvellinum.

Þetta var þó ekkert gríðarlegt vandamál. Vorum búin að fjárfesta í góðri kortabók (takk mamma Sigrún) og komum okkur því stórslysalaust til baka. Aksturinn hefur þó gengið merkilega vel, a.m.k. meðan maður passar sig á sporvögnunum sem renna hérna fram og til baka án þess að pæla mikið í umhverfinu.

Í matardeildinni hefur það gerst að við keyptum stórfurðulegan banana! Því miður gleymdist að taka mynd af dýrinu en þetta var dökkbrúnn banani sem leit út eins og hann væri handónýtur. Það var þó ekki málið - hann var ferskur og leit utan við litinn út eins og venjulegur banani. Annað kom þó í ljós þegar við reyndum að opna hann líkt og venjulegan banana. Hann var alls ekkert á því að ætla að opnast og reyndi eftir fremsta megni að berjast gegn tilraunum þess efnis. Loksins var ráðist á hann með hníf og þá tókst þetta loksins. Hann reyndist þó glerharður og þurfti að nota hníf til að skera bita úr honum. Þegar við svo smökkuðum hann hafði hann þau áhrif að þurrka gríðarlega upp munninn og var eins og meðal túrtappi hefði verið gleyptur :-) Afgangurinn endaði í ruslinu.

Þeir sem muna eftir atriðinu í Me, myself & Irene vita hvað við er átt! Alli er þó sannfærður um að þetta hljóti fólk að vera að tala um þegar það talar um þurr vín.

Adios amigos,
Alli & Sylvía

Gestagangur

2005-06-26T20:17:00.000+02:00

Jæja, höfum ekki verið sérlega dugleg að skrifa enda búin að hafa gesti undanfarnar tvær vikur. Mamma, pabbi (tengdó) og Matti komu hingað mánudaginn 13. júní. Ferðin byrjaði nú ekki vel þar sem flug þeirra frá Danaveldi var fellt niður - já það var bara hætt við það! Þeim seinkaði því um nokkra klukkutíma en komu þó um miðjan dag. En eins og við skötuhjú segjum "fall er fararheill" (tömdum okkur þann hugsunarhátt eftir fyrstu nóttina hérna :-)

Byrjuðum ferðina á dýragarðinum, við höfðum ekki farið þangað, vorum alltaf að bíða eftir Matta. Garðurinn er hiklaust með flottari dýragörðum og augljóslega mikið í hann lagt. Þar komumst við að því að sæljón eru einstaklega grumpy dýr. Annars var einna skemmtilegast að sjá leðurblökurnar því þær fá að fljúga lausar um í myrkvuðum göngum. Maður getur fengið þær beint í fangið ef maður er fyrir þeim. Þær eru þó mun færari í myrkri en við og því engar áhyggjur að hafa. Sumir voru þó frekar smeykir.

Að sjálfsögðu var borgin gengin þver og endilöng. Fannst okkur öllum þó standa upp úr að fara á hjólabáta á Vltava (Moldá). Þar gátum við farið undir Karlsbrúnna og upplifað Prag á sama hátt og fiskarnir í ánni. Við unga parið vorum að sjálfsögðu mun sprækari og íhuguðum að skutla líflínu til hinna eldri. Mælum að sjálfsögðu með slíkri ferð við alla sem koma til Prag.

Ekki var þó bara skoðað Prag heldur var farið til Kutna Hora en þar má finna eitt það merkilegasta fyrirbæri sem við höfum nokkur sinni séð! Þetta er einvers konar klaustur en að innan er það skreytt með mannabeinum. Fjöldinn er ógnvænlegur, en okkur skilst að á þessum 80 fm eða svo séu um 40.000 beinagrindur - alvöru beinagrindur! Það er nú eiginlega ekki hægt að lýsa þessu með orðum og ekki annað hægt en að verða kjaftstopp. Myndirnar eru einmitt þaðan og athugið að á efri myndinni er beinahrúga fyrir aftan þau sem innihalda tugþúsundir beina.

Eftir að Alli fór aftur til vinnu var farið á ströndina hér í Prag. Þetta var að sjálfsögðu gert í mjög góðu veðri og sást það vel á rauðum bjarma sem umkringdi strandarfara næstu daga.

Vonum að gestirnir hafi skemmt sér jafn vel og við. Erum strax farin að bíða eftir næstu gestum.

Over and out,
Sylvía & Alli

Crazy weather

2005-06-08T21:38:00.000+02:00

Við höfum komist að þeirri niðurstöðu að á Íslandi er mjög takmarkað veður. Maður þekkir bara rigningu, snjó og rok þaðan. Hérna er sko eitthvað nýtt af nálinni. Það er ekkert sjaldgjæft að upplifa þrumur og eldingar hér. En við upplifðum þó eitt það magnaðasta eftir að við fluttum hingað núna nýlega.

Það var nefninlega 30°C hiti úti en skýjað. Alli að keyra heim úr vinnunni og Sylvía heima. Alli var einmitt nýbúinn að hafa orð á logninu en þegar ég leit út fannst mér rosalega mikill vindur, tréin í garðinum nánast á hliðinni. Þá kom haglél - já, í þessum 30°C kom haglél og grenjandi rigning - ekkert íslenskt sull. Ekkert svona íslenskt haglél heldur voru höglin á stærð við vínber og upp í golfbolta! Alli var að keyra og vissi ekki hvaðan á sig stóð veðrið (einstaklega skemmtilegt orðalag í þessu tilfelli) því það drundi svoleiðis í bílnum og hann upptekinn við að sveigja fram hjá heilu og hálfu trjánum sem fuku á veginn. Eins og þið getið ímyndað ykkur var fólk náttúrulega fljótt að koma sér í skjól enda ekkert grín að vera rotaður af hagli!

Þegar nær dró heimilinu hafði myndast árfarvegur á vegunum og þar sem við erum ekki á Hummer átti litla greyið (Golfinn okkar) erfitt með sig og ætlaði varla að ná að klára ferðina. Þetta hafðist þó að lokum.
Sylvía var heima og um leið og hún sá hvað í stefndi með veðrið var hún fljót að ná í myndavélina (vissum að þið mynduð ekki trúa þessu án mynda) og búa til sönnunargögn. Eigum líka videoclip sem hægt er að skoða hér, verið með hljóðið á. ATH enn og aftur - það var 30°C þegar þetta var tekið!

Annars hefur lítið á daga okkar drifið síðan síðast. Erum bara að njóta þess að búa í útlandinu. Svo eru bara 5 dagar í fyrstu gestina okkar :-) Mamma, pabbi og Matti alveg að koma - vantar bara Gauja og Brand.

Kveðja,
Sylvía & Alli

Feelin' hot hot hot

2005-05-28T18:28:00.000+02:00

Já það er sko heitt hjá okkur hérna í Prag. Hangir í 30°C sem er bara ljúft! Erum búin að baka okkur almennilega í dag og stefnir í áframhaldandi mall á morgun :-)

Skiljum hreinlega ekki af hverju Pragbúar eru ekki búnir að gera vatnsleikjagarð hérna, það væri sko vel þegið! Alli reyndi þó að skapa þannig stemningu með því að hella yfir Sylvíu meðan hún lá afslöppuð í sólbaði. Þetta reyndist ekki hafa sömu áhrif og meðal sundlaug. Alli mun þó halda áfram að reyna.

Sólardögum er eytt í garðinum hérna hinum megin við götuna. Þar safnast saman þó nokkur hópur af fólki, Tékkum, útlendingum og að ógleymdum hundunum og alltaf góð stemning. Höfum þó komist að þeirri niðurstöðu að kanarnir hérna skari fram úr þegar kemur að frisbee-kasti þar sem þeir halda á bjórglasi án þess að hella niður dropa á meðan þeir kasta tugi metra.
(Alli: Guðjón þú verður að koma hingað í æfingabúðir, aðstaðan ólíkt betri en hjá Landmat.)

Jæja, ætlum að koma okkur út að borða.. að sjálfsögðu utandyra.
Sylvía & Alli

Löggan stal bílunum

2005-05-23T22:06:00.000+02:00

Við höfum ekki skrifað í alltof langan tíma þar sem netið datt út hjá okkur. Þar sem þjónustan hér er einstaklega hæg tók það kappana meira en viku að setja það upp aftur hjá okkur og það eftir margar áminningar frá okkur. Vonum að nettengingin endist lengur í þetta skiptið.

Það er gerðist þó eitt markvert í vikunni sem leið, löggan mætti á svæðið og fjarlægði alla bílana sem voru við götuna fyrir utan hjá okkur ásamt öðrum götum hverfisins. Þeir höfðu nú að vísu ástæðu til, það var búið að setja upp bannmerki við því að leggja við göturnar á ákveðnum tíma, 20. maí milli 7:00 - 11:00, því þá átti að smúla götuna. Við höfðum sem betur fer tekið mark á þessum merkjum og því bíll okkar óhultur. En það er ekki hægt að segja um alla bílana því lögreglan fjarlægði fleiri tugi og keyrði með þá burtu. Þetta hefði maður nú aldrei séð á klakanum!

Þetta var þó stórgott því það virtist miklum vandkvæðum háð að ná þessum bílum til baka og enn eru laus stæði við götuna, það er mjög sjaldgæft. Hér eru stæði nýtt mun betur en á Íslandi. Setjum við því hér inn sönnun fyrir því hvað við erum orðin dugleg að leggja. ATH þetta var nú samt frekar þægilegt stæði!

Annars erum við loksins búin að kaupa okkur fataskáp í svefnherbergið. Vorum bara með kommóðu sem var nú ekki alveg nóg fyrir fötin okkar beggja. Þannig að ferðatöskurnar eru ekki ennþá á gólfinu hjá okkur.

Eins og sjá má er myndavélin ekki biluð og við munum fara að skjóta inn fleiri myndum á næstunni.. eins og þessari :-)
Já já, það er varasamt að sitja úti í sólinni að lesa, er þó kaffibrún núna.

Kveðja,
Sylvía & Alli

Fundum kisu

2005-05-09T22:00:00.000+02:00

Það er búið að vera hrikalega kalt hérna, í kringum 10-12°C og við farin að íhuga notkun á KRAFTgöllunum (sem var samviskusamlega pakkað með).

Engu að síður var farið í rosalega göngu á síðastliðinn sunnudag, áttum loksins lausa helgi og það var farið í túristaleik. Gengum að Hrad en það er aðalkastali Prag og eiginlega ekkert annað að segja en vá. Eftir að hafa skoðað sjálfan kastalann skoðuðum við kastalagarðana, en þetta er hálfgert völundarhús af görðum sem liggur niður hlíðina frá kastalaveggnum.

Neðst í garðinum varð fagnaðarfundur þegar Sylvía fann loksins kisu í Prag! Það er gríðarmikið af hundum hérna en lítið sem ekkert hefur sést af köttum. Þarna var á ferðinni smágerð bröndótt læða sem bræddi okkur alveg enda rosalega gæf. Þar sem fljótt kom í ljós að sú stutta var stútfull af kettlingum hefur Sylvía verið óalandi síðan í gær - núna á að koma ketti inn á heimilið. Alli hefur ekki verið alveg jafn liðtækur í þessu, bendir ótt og títt að við viljum ekki láta hakka leðursófann okkar.

Lentum í merkilegri lífsreynslu þegar við komum í enn einn garðinn. Heyrðum þetta líka rosalega garg úr einu horninu. Þegar nánar var að gáð var þar fasani í góðum gír eins ekkert væri sjálfsagðra! Þeir sem ekki þekkja hvað við er átt er bent á að smella hér. Stélið líklega um einn meterinn.

Biðjum að heilsa,
Alli & Sylvía

Komin með netið heim

2005-05-05T19:26:00.000+02:00

Já, loksins erum við komin með netið heim og getum því farið að standa okkur betur með þetta blessaða blogg okkar. Svo hefur Sylvía líka eitthvað að gera á daginn.

Sylvía átti afmæli síðasta mánudag og sárnaði gríðarlega hve fáir mættu til að fagna því með henni. En háskólinn sem hún sótti um í lagði þó sitt til og veitti henni inngöngu á afmælisdaginn. Það þýðir að í lok ágúst byrjar Sylvía í Business Administration námi hjá Anglo-American College hérna í Prag. Svo lögðu jú veðurguðirnir sitt af mörkum til þess að gera afmælisdaginn enn ánægjulegri og var hérna 30°C hiti og glampandi sól, eins og Skorradalsfólk myndi segja "bongóblíða". Sylvía tók loksins einhvern lit og er hætt að falla inn í veggi íbúðarinnar, Alli gerir það þó enn :-)

Það hefur verið pressað á okkur með að senda myndir úr íbúðinni en höfum ákveðið að gera það ekki, einungis myndir utan af húsinu og svo auðvitað nánasta umhverfi (Prag). Þetta vonum við að verði hvatning fyrir sem flesta til þess að koma og sjá.

Bökunarvörurnar sem við vorum að leita að fundust loksins, lyftiduft er t.d. Kyprici prasek do peciva sem er náttúrulega alveg augljóst, af hverju datt manni það ekki strax í hug?!? Það er ekki möguleiki að gera sig skiljanlegan í matvöruverslunum, þar talar ENGINN ensku. Alli þurfti að leika býflugu til þess við fyndum hunangið.

Annars hefur lítið á daga okkar drifið undanfarið og loksins að komast einhver regla á líf okkar hérna. Við erum að sjálfsögðu byrjuð í ræktinni hérna úti, eins og þeir sem okkur þekkja bjuggust kannski við. Hérna er ræktin þó örlítið öðruvísi en við vorum vön heima, hún er svona 1/15 af World Class í Laugum.

Þar sem við vorum einmitt að koma úr ræktinni og Alli búinn að svolgra í sig prótínshakenum þá ætlum við í sturtu núna.

Látum heyra í okkur seinna,
Sylvía & Alli

Matur

2005-04-25T21:52:00.000+02:00

Þá erum við byrjuð að elda. Fórum í gær og leituðum uppi potta og pönnur, það reyndist erfiðara að finna en við áætluðum en gekk þó upp að lokum. Nú getum við því loksins byrjað að elda. Það er þó öllu erfiðara að finna rétt hráefni. Ef einhver veit hvað eftirfarandi er á tékknesku endilega látið okkur vita: púðursykur, kartöflumjöl og maísenamjöl.

Annars er það helst í fréttum að við erum búin að kaupa sófa :-) Fundum þennan glæsilega sófa í einhverri húsgagnavöruverslun sem við tókum eftir fyrir algjöra tilviljun. Eftir langa leit höfum við komist að þeirri niðurstöðu að Tékkar eru upp til hópa vita smekklausir. Það á þó alls ekki við byggingarnar þeirra, þar verðum við Íslendingar víst að játa slaka frammistöðu.

Já, svo er náttúrulega hæst í fréttum að loksins hefur Sylvía fengið það viðurkennt.. hún er VSP (næstum því það sama og VIP), já VSP stendur nefninlega fyrir Very Sexy Person. Þetta kom í ljós þegar við skelltum okkur á einn klúbbinn hérna, þá fengu allir armbönd og á armbandinu hennar Sylvíu stóða sem sagt Very Sexy Person. Á Alla armbandi var bara logo staðarins.

Gæludýrabúðirnar hérna eru snilld! Við fundum apa í einni slíkri og erum byrjuð að safna. Hann er frekar lítill með langt skott og ótrúlega mannlegur í töktum. Annars er einn stór galli á dýrabúðunum hér, þar eru seldar risastórar kóngulær. Maður er að skoða búrin og litlar sætar kanínur svo er allt í einu kónguló á stærð við kiwi (er sko ekki að ýkja) í einu búranna. Já Sylvía hefur fengið ófáar matraðirnar eftir slíka reynslu. Annars er svolítið skrítið að sjá mýs til sölu hérna, annars vegar sem gæludýr og hins vegar sem fæðu fyrir slöngur sem einnig er nóg af í búðunum. Ætli þessi skrímsli sleppi aldrei út?!?

Jæja ætlum að fara að horfa á Groundhog day (Sylvía fékk að velja mynd),
Sylvía & Alli

Brúmm brúmm!

2005-04-21T09:10:00.000+02:00

Já, mikið rétt. Við erum loksins komin með bíl og getum því týnst á miklu stærra svæði en áður. Það tókst ágætlega í gær. Vorum á leið í IKEA samkvæmt korti sem við höfðum fjárfest í en enduðum út af kortinu (ath. kortið á að þekja alla borgina!). Þetta hefði nú ekki verið svo slæmt nema fyrir það að allt í einu fór olíuljósið að blikka! Nú voru góð ráð dýr. Næsta sjáanlega mannvirki var hjólhýsi og erfitt að leiðbeina leigubíl til að koma þangað.

Eftir að hafa mælt olíuna á bílnum var ákveðið að reyna að starta á ný. Ekkert ljós kviknaði og keyrt var af stað á ný og viti menn, við enduðum í IKEA. Að vísu rétt fyrir lokun og því sprettað í gegnum búðina. Þeir sem farið hafa í IKEA átta sig á hvað það geta verið mikil vandræði að mæta rétt fyrir lokun – tekur fleiri mínútur að bögglast í gegnum alla búðina áður en maður kemur að kössunum!

Annars er ekkert grín að keyra hérna í Prag. Á Íslandi þykir stæði ekki boðlegt nema að það séu a.m.k. 150 cm fyrir framan OG fyrir aftan bílinn. Hérna þykir bara nokkuð gott ef það eru 15 cm sitthvorum megin við bílinn og léleg nýting ef meira er. Síðan eru þeir ótrúlega hrifnir af einstefnugötum – allt upp í 5 akreina einstefnugötur. Þannig ef maður tekur eina vitlausa beygju getur maður lent í því að keyra fleiri kílómetra áður en hægt er að rétta sig af á ný (við ættum nú að þekkja það).

Meðan við munum! Allir eiga að krossleggja fingur fyrir Sylvíu næsta föstudag klukkan 10:00 (8:00 að íslenskum tíma). Hún er að fara í viðtal hjá háskólanum sem sótt var um í og þetta þarf að ganga vel. Við erum búin að rölta hjá skólanum og þetta lítur mjög vel út, rétt hjá Karlsbrúnni. Reyndar er smá vandamál. Sylvía fór þangað með einhver gögn fyrr í vikunni og það reyndist meira en að segja það að komast inn. Hurðin er eitthvað ægilegt kastalahlið sem er ekkert fyrir meðalmanninn að átta sig á hvernig á að komast í gegnum. Það verður því að krossleggja líka 5 mínútum fyrr að hún komist inn í skólann ;-)

Síðan ætlum við að fara að taka okkur á í blogginu. Fengum smávegis skammir fyrir að vera ekki nógu dugleg að uppfæra. Viljum þó segja okkur til málsbóta að við erum búin að vera á hvolfi við að standsetja heimili. Höfum ekki einu sinni fundið sófa í stofuna enn þá þannig hún er enn galtóm. Einnig kom í ljós að við erum með bloggið vitlaust stillt þannig aðeins þeir sem eru skráðir meðlimir blogspot geta commentað (skilið eftir skilaboð) fyrir neðan hvert innlegg hjá okkur. Úr þessu verður bætt í snarhasti! Catia – þakka ábendinguna ;-)

Biðjum að heilsa í allar áttir,
Alli & Sylvía

Sjónvarpið komið!

2005-04-14T10:33:00.000+02:00

Já, nú getur Alli tekið gleði sína á ný eftir margar vansvefta nætur án sjónvarps!

Sökum húsgagnaleysis í stofunni er svefnherbergið nú þakið snúrum við litla ánægju hússtýru.
Reyndar er lítið hægt að horfa á því allar myndir og þættir í tékknesku sjónvarpi talsettar og okkar DVD myndir allar í kassa hjá tollinum. Við erum ekki hrifin af tollinum.

Merkur áfangi náðist í dag, Sylvía fann góðan eftirrétt á tékkneskum veitingastað og það vill svo til að hann er bara á næsta horni. Hingað til hefur verið lifað á Friday’s eftirréttum. Alli hefur þó blendnar tilfinningar gagnvart þessari nýju uppgötun þar sem hann getur lítið gert til að stöðva óhemjuna sem hleypur í Sylvíu þegar um eftirrétti er að ræða.

Annars lítur allt út fyrir að við fáum kassana okkar frá tollinum á morgun og þá ekki farið úr húsi heldur bara horft á sjónvarp.. fái Alli að ráða einhverju þar sem við keyptum heimabíókerfi líka.

Jæja, lítið annað í fréttum og við farin að horfa á Tékkana bulla í sjónvarpinu,
Sylvía & Alli

Veik í Prag

2005-04-12T08:45:00.000+02:00

Jæja, ekki byrjaði það glæsilega fyrstu nóttina í nýjum heimkynnum. Sylvía alveg að hengjast með hita og uppköst og Alli með aðeins vægari útgáfu af sömu einkennum. Við erum svo ALFARIÐ að treysta á að fall sé fararheill!

Við erum þó með góðar fréttir! Sylvía fann könguló í dag og spyrja mætti af hverju það eru svona góðar fréttir. Jú, það veit víst á afar lukkulega framtíð í nýjum heimkynnum finnist könguló þar. Þar sem húsbóndinn á heimilinu (að því sem hann telur) var í vinnu var hún handsömuð í glas og hlaupið upp í rúm þangað til einhver gæti stútað dýrinu. Þetta endaði allt vel.

Okkur líður þó afar vel núna og erum farin að njóta þess í botn að vera hérna. Það er æðislegt að labba hérna um hvort sem er á dagin eða kvöldin og enn og aftur skorað á gesti að fara að mæta! Við eigum meira að segja von á gestarúmi á morgun þannig að það er ekki eftir neinu að bíða.

Sylvía er alveg veik – þó ekki á sama hátt og áður var minnst á. Það eiga ALLIR hunda hérna og allt morandi í þessum ferfætlingum. Í garðinum á móti íbúðinni eru óteljandi hundar af öllum stærðum og gerðum í göngutúr með fylgifiska sína. Í miklu uppáhaldi eru fimm svartir hundar sem við sjáum daglega. Þeir eru allir nákvæmlega eins, litlir og loðnir, og eru ótrúlega skondnir saman í hrúgu þar sem greina má hausa og lappir í massavís. Við reynum að ná mynd af köppunum og smella hérna inn. Ekki er vitað hversu lengi verður hægt að halda út án þess að vera kominn með a.m.k. einn slíkan á heimilið – sjáum til.

Talandi um myndavélina þá erum við búin að vera ótrúlega löt við að mynda. Þetta horfir einhvernvegin öðruvísi við þegar maður verður hérna í að minnsta kosti heilt ár. Að vísu hefur tíminn flogið frá okkur og við verið á fullu við að “mixa” nýja heimilið.

Ætli það sé þá ekki kominn tími á að koma sér í rúmið. Þar sem við erum ekki enn nettengd verður þessu smellt inn í fyrramálið og ætli það verði ekki þannig eitthvað áfram. Við munum þó reyna að redda nettengingu og upp frá því ættum við að verða duglegri að blogga.

Mamma (Sigrún): Sylvía kemur á MSN fljótlega!

Farin í rúmið,
Alli & Sylvía

Komin með íbúð!

2005-04-08T13:18:00.000+02:00

Eftir að hafa eytt morgninum hjá fasteignasala erum við komin með lykla og alles að íbúðinni okkar. Vantar að vísu ennþá rúm, borð, stóla og tja.. bara allt sem maður þarf á að halda í íbúð. Mikill kostur þó að við erum með uppþvottavél, vantar bara leirtau :-)

Lofthæðin í íbúðinni er nú eitthvað hærri en á Íslandi, líklegast svona þrír metrar. Þó það líti rosa vel út núna er ekki ólíklegt að maður eigi eftir að blóta því þegar það fer að kólna næsta haust, en það er seinni tíma vandamál, erum með KRAFT-gallana í farangrinum.

Eins og allir sannir Íslendingar þá erum við að fara að kíkja í IKEA núna á eftir. Allar hugmyndir að góðum húsgagnaverslunum í Prag eru vel þegnar.

Jæja, ætlum á húsgagnaveiðar,
Sylvía & Alli

Alla leið

2005-04-07T14:55:00.000+02:00

Þá erum við mætt til Prag!

Það sem kemur okkur mest á óvart er veðrið hérna. Við áttum jú von á að það væri örlítið skárra en "heima" á Íslandi en það er töluvert mikið heitara hérna. Erum búin að vera á röltinu í léttum fatnaði og það er ekkert mál, semsagt hið besta mál. Sylvía brosir út að eyrum :-)

Mikið af fallegum flottum byggingum og allt í skrauti. Unglingar telja sig þó færari en byggingameistarar í þessum efnum og hjálpa fullmikið til við skreytingar að okkar mati.

Morguninn fór í að skoða íbúðir og við erum líklega búin að finna þá einu réttu. Nú er bara verið að víla og díla og kemur í ljós í fyrramálið hvort það gengur allt saman eftir. Að sjálfsögðu er gestaherbergi til staðar og hér með skorað á alla sem þetta lesa að fara að safna fyrir ferð til Prag!

Jæja, ætli það sé þá ekki kominn tími á að rölta út og næla sér í eitthvað gott í svanginn áður en við höldum áfram að skoða borgina.

Bless í bili,
Alli & Sylvía

Hálfa leið

2005-04-06T14:16:00.000+02:00

Jæja, þá er ferðin hafin! Erum mætt til Svíþjóðar og vitum ekkert hvað við erum að gera - flytja til Prag? Ótrúlegt! :-)

Vorum búin að lofa að smella upp bloggi til að leyfa fólki að fylgjast með okkur og erum að redda því hérna á flugvellinum þar sem við höfum ekkert skárra að gera.

Vorum að tékka á veðrinu úti í Prag og eru þar núna 17°C sem er ekkert nema snilld, það snjóaði þegar við stigum upp í vélina á klakanum. Núna eigum við hvergi heima, en það rætist vonandi úr því á næstu dögum.

Verðum í frekara sambandi,
Alli & Sylvía